Kryetarja e Kuvendit, Albulena Haxhiu është përplasur me deputetët opozitarë në seancën e jashtëzakonshme për ndryshimet kushtetuese për zgjedhjen e presidentit nga qytetarët, raporton KosovaPress.
Ajo ka bërë polemika me deputetin e PDK-së, Përparim Gruda, i cili në një moment i është drejtuar asaj duke i thënë se si kryeparlamentare nuk duhet të lejojë shkeljen e Rregullores së Kuvendit.
Gruda tha se procedimi i amendamenteve të vitit 2011 për ndryshime kushtetuese që presidenti të zgjidhet drejtpërdrejt nga qytetarët është në shkelje të rregullores dhe kushtetutës.
“Unë po flas me juve se ju kujdeseni për rregulloren në seancë. Pse jo ty. Për këtë rregullore kujdeseni ju apo jo. Ju jeni autoriteti final për rregulloren. Pse lejon me u shkel rregullorja e Kuvendit”, tha ai.
Polemika me Haxhiun bëri edhe deputetja e LDK-së, Hykmete Bajrami, ndërkaq asaj ia ndërpreu dy herë fjalën kryeparlamentarja.
“Jam pikërisht aty kryetare. Këta sot na sjellin amendamente kushtetuese dhe i ofendojnë të gjithë pacientët që janë spitaleve. Këta sot janë kundër qytetarëve që ikin nga Gjermania. Është turp, i keni marrë 51 për qind dhe nuk dini me qeverisë”, shtoi ajo.
Arsye për këtë Haxhiu tha se është dalja nga rendi i ditës.
“Ju lutem të flisni për rendin e ditës. Rregullorja ma lejon që nëse jeni jashtë rendit të ditës ta ndërpres fjalën”, tha ajo
Në anën tjetër, deputeti i LDK-së, Armend Zemaj kërkoi tërheqjen e amendamenteve të propozuara nga presidentja Vjosa Osmani.
“Tërhiqni këto amendamente, mos e bëni përrallë veten dhe Kuvendin e Kosovës”, tha ai.
Por kryeparlamentarja, Albulena Haxhiu tha se amendamentet kushtetuese i ka kërkuar presidentja, e jo kryeministri as shumica parlamentare.
Video:“Amendamentet kushtetuese i ka paraqitur presidentja, e jo kryeministri apo unë”, tha ai.
