Një incident fizik mes dy të miturave në shkollën ekonomike “Hasan Prishtina” në Mitrovicë të Jugut ka përfunduar me inicim të rasteve penale ndaj një të miture dhe babait të njërës prej vajzave.

Ngjarja ka ndodhur më 26 prill 2026. Sipas burimeve të KosovaPressit, fillimisht një e mitur dyshohet se ka sulmuar fizikisht bashkëmoshataren e saj brenda ambienteve të shkollës.

Pas incidentit, dyshohet se babai i vajzës së dëmtuar  ka sulmuar fizikisht të miturën që dyshohet se kishte rrahur vajzën e tij.

Lidhur me rastin, Prokuroria Themelore në Mitrovicë ka konfirmuar se ndaj babait është iniciuar procedurë penale për veprën “Lëndimi i lehtë trupor”.

“Në raport me këtë çështje, prokurori kujdestar kompetent nga Departamenti i Përgjithshëm, në raport me babain e përfshirë në këtë rast, ka hapur rast penal për veprën penale ‘Lëndimi i lehtë trupor’”, thuhet në përgjigjen e Prokurorisë.

Ndërkohë, Departamenti për të Mitur ka iniciuar rast penal edhe ndaj të miturës, e cila dyshohet për veprën penale “Sulmi”, sipas nenit 184 të Kodit Penal të Republikës së Kosovës.

Sipas Prokurorisë, e mitura është intervistuar në cilësinë e të dyshuarës në prani të mbrojtësit, në përputhje me procedurat ligjore për të miturit.

/Kosovapress/