Kanë përfunduar dy ndeshjet kualifikuese drejt Kampionatit Botëror “Katar 2022”, ku kemi mësuar edhe dy kombëtare të tjera që kanë siguruar biletat.

Pas plot 90’ minutave lojë të zhvilluara, Kombëtarja e Polonisë e ka eliminuar Suedinë, duke e mposhtur si vendase me rezultat solid 2:0, përcjell KosovaPress.

Golat te polakët i shënuan ylli i Bayern Munichut, Robert Lewandowski (minuta e 49’), dhe mesfushori i Napolit, Piotr Zielinski (minuta e 73’).

Ndërkaq, krahas këtij takimi u zhvillua edhe përballja tejet interesante mes Kombëtares së Portugalisë dhe asaj të Maqedonisë së Veriut, në të cilën vendasit shuan ëndrrat e Enis Bardhit, Arijan Ademit, Ezgjan Alioskit dhe Visar Musliut për “Botëror”.

Portugalia ka shënuar fitore solide me rezultat 2:0 kundër Maqedonisë së Veriut, kështu duke siguruar biletën e radhës drejt Katarit.

Heroi i vendasve ishte mesfushori i Manchester United Bruno Fernandes, i cili shënoi dy gola në ndeshjen e sotme, fillimisht në minutën e 32’ për 1:0 dhe më pas në minutën e 65’ për rezultatin final 2:0.

Rezultatet e dy ndeshjeve të sotme për kualifikueset drejt Botërorit “Katar 2022” i gjeni më poshtë.

Polonia 2:0 Suedia

Portugalia 2:0 Maqedonia e Veriut