Florentino Pérez u është përgjigjur me tone shumë të ashpra thashethemeve për gjendjen e tij shëndetësore dhe moshën.

Ai akuzoi mediat për një fushatë absurde sulmesh personale, duke mohuar kategorikisht lajmet se vuan nga ndonjë sëmundje e rëndë.

"Thonë se jam i sëmurë dhe se kam kancer terminal. Shëndeti im është perfekt. Thonë se jam i lodhur, se jam i vjetër... as që e njoh zotërinë që e ka shkruar këtë," deklaroi 79-vjeçari, duke sfiduar hapur gazetarët e pranishëm në sallë.

Pérez insistoi se do të kandidojë sërish për të mbrojtur klubin nga gazetarët që, sipas tij, mendojnë se mund ta frikësojnë apo të ndikojnë në vendimet e Real Madridit.

Gjatë konferencës, situata u tensionua deri në debate direkte, ku Pérez thirri në emër gazetarë specifikë, duke i akuzuar ata për krijimin e trazirave brenda klubit.

Ai mbrojti punën e tij duke kujtuar sukseset e panumërta, pavarësisht se ky sezon përfundoi pa trofe.

"Gazetarët mendojnë se çfarëdo që thonë, njerëzit do t'i besojnë. Por njerëzit më besojnë mua. Pse doni të më vritni? Jam zgjedhur presidenti më i mirë në histori dhe kemi skuadrën më me vlerë," u shpreh ai me irritim.

Pérez e mbylli fjalimin duke goditur profesionalizmin e mediave spanjolle, duke thënë se disa prej tyre "as nuk e dinë nëse marrin vesh nga futbolli", ndërsa konfirmoi se mbetet në krye të Realit dhe kompanisë së tij ACS me fuqi të plotë.

KosovaPress