Mbrojtësi brazilian Marcelo ka njoftuar tërheqjen e tij nga futbolli në moshën 36-vjeçare. Mbrojtësi i majtë, një nga lojtarët me më së shumti trofe në histori, luajti 58 herë për Brazilin.

Pasi kaloi në radhët e klubit brazilian Fluminense, Marcelo iu bashkua Real Madridit në vitin 2007 në moshën 18-vjeçare. Ai fitoi 25 trofe në 15 vjet në “Bernabeu”, duke përfshirë pesë tituj të Ligës së Kampionëve dhe gjashtë tituj të La Ligës.

“Në moshën 18 vjeç, Real Madridi trokiti në derën time dhe arrita këtu. Tani, me krenari mund të them se jam një Madrileno i vërtetë”, ka thënë Marcelo në një video në rrjetet e tij sociale, përcjellë KosovaPress.

“Gjashtëmbëdhjetë sezone, 25 tituj, pesë Liga të Kampionëve, një nga kapitenët dhe kaq shumë netë magjike në Bernabeu. Çfarë udhëtimi! Udhëtimi im si lojtar përfundon këtu, por kam ende shumë për t'i dhënë futbollit. Faleminderit për gjithçka", ka shkruar Marcelo.

Marcelo u emërua kapiten i klubit në vitin 2021, duke u bërë i pari jo-spanjoll që merr shiritin në krahë në klub në 117 vjet.

Presidenti i Real Madridit, Florentino Perez tha: “Marcelo është një nga mbrojtësit e majtë më të mëdhenj në historinë e Real Madridit dhe futbollit botëror, dhe ne kemi pasur privilegjin ta shijojmë atë për një kohë të gjatë. Ai është një nga legjendat tona më të mëdha dhe Real Madridi është dhe do të jetë gjithmonë shtëpia e tij”.

Ai u largua nga Madridi në fund të sezonit 2021-22 për t'u bashkuar me skuadrën greke Olympiacos, por e ndërpreu marrëveshjen e tij vetëm pesë muaj pas bashkimit.

Marcelo iu bashkua sërish klubit të fëmijërisë Fluminense në vitin 2023 dhe kaloi dy sezone në klub, duke bërë 68 paraqitje.

Mbrojtësi u largua me pëlqim të përbashkët nëntorin e kaluar, pas një mosmarrëveshjeje publike me menaxherin Mano Menezes.