Ministri i Punëve të Brendshme Xhelal Sveçla, më 23 dhe 24 dhjetor ka paralajmëruar vizitë zyrtare njëditore në Luginën e Preshevës, por Qeveria e Serbisë ka refuzuar kërkesën.

Ministri Sveçla kishte paraparë takime me përfaqësuesit e Këshillit Kombëtar të Shqiptarëve të Luginës, duke filluar me përfaqësuesit e Zyrës së KKSH-së në Medvegjë, për të vazhduar në Bujanoc, në selinë e KKSH-së, si dhe më pas në Preshevë, në selinë e degës së KKSH-së për këtë komunë.

Ministria e Jashtme e Kosovës njofton se janë ndjekur të gjitha procedurat e parapara për vizita të tilla sipas marrëveshjes së Brukselit, por Serbia si pretekst për refuzim ka theksuar qëndrimet e Sveçlës, të cilat, sipas Beogradit janë të drejtuara kundër serbëve në Kosovë, normalizimit të paqes dhe stabilitetit.

Qeveria e Serbisë gjatë këtyre dy vjetëve të fundit ka refuzuar rregullisht vizitat e zyrtarëve të lartë qeveritarë të Kosovës, posaçërisht kur bëhet fjalë për vizitat në Luginë.

Përveç Sveçlës, janë refuzuar rregullisht edhe vizitat e ministrave të tjerë të kabinetit qeveritar të Kosovës, e fundit nga të cilat ka qenë vizita e ministrit për Kulturë Hajrulla Çeku, e paralajmëruar më 19 dhjetor 2024.

Për më tepër, edhe vizita e ministres së Jashtme Donika Gërvalla, e paralajmëruar më 27 shkurt 2024, për të marrë pjesë në përvjetorin e pavarësisë së Kosovës, e organizuar nga Zyra Ndërlidhëse e Kosovës në Serbi, ishte refuzuar pa asnjë arsyetim.

Veprime të tilla të Qeverisë së Serbisë kanë për qëllim të qartë mbajtjen e tensioneve me Kosovën në shkallë të lartë dhe pjesë e provokimeve të vazhdueshme, të cilat Beogradi zyrtar i bën në baza të rregullta dhe me qëllim të shkaktimit të konflikteve, ku aktet terroriste në Banjska dhe Ibër-Lepenc janë manifestimi më i dukshëm i tyre.