Kombëtarja e Kosovës në paravolejboll po shkruan histori në paraqitjen e saj të parë në një turne ndërkombëtar, i cili po zhvillohet në Rotondo të Italisë nga 23 deri më 25 korrik. Përfaqësuesja kosovare po garon përkrah Italisë, Anglisë dhe Spanjës, duke fituar përvojë të rëndësishme në arenën ndërkombëtare.

Kosova e ka nisur në mënyrën më të mirë të mundshme këtë turne, duke regjistruar dy fitore në dy ndeshjet e para. Në takimin hapës, përfaqësuesja kosovare triumfoi ndaj Spanjës me rezultat 2:0, ndërsa në ndeshjen e dytë mposhti Anglinë me rezultat 2:1.

Sfida e radhës për Kombëtaren e Kosovës do të zhvillohet sonte nga ora 22:00, kur do të përballet me nikoqiren, Italinë.