Panairi nuk është çështje vetëm e organizmit, por dëshmi e qëndrueshmërisë, rezistencës dhe përkushtimit të shtëpive botuese që bashkë me autorët të krijojnë dhe ofrojnë përmbajtje cilësore për lexuesit në Kosovë.

Kështu tha ministri i Kulturës, Rinisë dhe Sportit në edicionin e 24-të të Panairit të Librit, i cili u hap sot në Prishtinë me moton “Përgjigjja është libri”.

Hajrulla Çeku ka thënë për KosovaPress se gjeneratat e reja të autorëve, krijuesve në letërsi janë duke sjellë një frymë të re, dhe sipas tij kjo është arsyeja kryesore pse nuk ka rënie në nivelin e leximit.

Ministrja e Arsimit, Shkencës, Teknologjisë dhe Inovacionit,  Arbërie Nagavci ka thënë se ministria që ajo drejton ka ndërmarrë një rishikim të thellë të teksteve shkollore duke punuar në tekstet e gjuhës shqipe dhe matematikës, për arsye që fëmijët të rriten me tekste cilësore dhe efektive.

Drejtoresha komunale për Kulturë në Prishtinë Sibel Halimi u ka bërë thirrje shkrimtarëve dhe lexuesve të promovojnë sa më shumë leximin, pasi sipas saj niveli i leximit është duke shënuar rënie.

Edicioni i 24-të i Panairit të Librit, organizuar nga Shoqata e Botuesve të Kosovës (SHBK), mbahet prej 5 deri më 9 qershor 2024, në Pallatin e Rinisë në Prishtinë.

Në panair marrin pjesë rreth 100 botues nga Kosova, Shqipëria, Maqedonia e Veriut dhe diaspora, me rreth gjashtë mijë tituj, prej tyre dy mijë tituj të rinj.

Në kuadër të panairit do të shënohet edhe 100-vjetori i lindjes së At Zef Pllumit, 100-vjetori i vdekjes së Franc Kafkës dhe aktivitete tjera, ku spikasin i ftuari i nderit shkrimtari francez Eric Faye, fitues i Çmimit të Madh për roman të Akademisë Franceze dhe Çmimit Deux-Margots, botimi dhe promovimi i vëllimit testament të Rexhep Qosjes, po ashtu i ftuar i nderit.

Lajmi i plotë në sistemin me parapagim.

•