Osmani paralajmëron rikthimin e fuqishëm të Prishtinës në luftën për titull
Lexohet për: 2 min.
3 muaj më parë
Linku u kopjua
Në edicionin e ri të Superligës së Kosovës në futboll që do të nisë më 10 gusht, klubi i futbollit Prishtina do të hyjë me ambicie të mëdha për titullin e kampionit.
Kështu ka thënë në një intervistë për KosovaPress, drejtori i Përgjithshëm i klubit bardh e kaltër, Artan Osmani.
“Ky është synimi ynë për këtë vit, praktikisht ne do të jemi në luftë për titull, nëse gjithçka shkon sipas planifikimeve sepse në futboll ky ‘topi i rrumbullakët” na është bërë si ëndërr e keqe sepse çdo dështim arsyetohet me ‘topin e rrumbullakët’. Si do që të jetë përgatitjet i kemi bërë për të luftuar për titull dhe jemi shumë të sigurt se do të jemi konkurrent, por jo vetëm ajo, ne duhet të tregojmë performancë dhe suksese edhe në Evropë”, tha Osmani.
Sipas Osmanit, ekipi tashmë është i kompletuar dhe udhëheqja e tij i është besuar trajneri francez Jean Michel Cavalli.
Osmani ka thënë se trajnerët vendorë nuk po arrijnë ta dërgojnë Prishtinën në një nivel më të lartë, andaj është vendosur për angazhimin e një trajneri të huaj.
Edhe blerjet në afatin kalimtar veror nga ana e klubit, sipas Osmanit, ja bërë në koordinim të plotë me trajnerin francez.
Drejtori i përgjithshëm i KF Prishtinës bëri të ditur se ndeshjet e kampionatit do t’i zhvillojnë në stadiumin “Fadil Vokrri”, pasi tashmë fusha është rinovuar dhe e gatshme për lojë.
