Osmani e pret në takim Hovenierin, e njofton se ka nisur fazën e konsultimeve për zgjedhjet e rregullta
Presidentja e vendit Vjosa Osmani ka pritur sot në takim ambasadorin e SHBA-së, Jeffrey Hovenier.
Në takim, presidentja Vjosa Osmani dhe ambasadori Jeffrey Hovenier kanë diskutuar për koordinim për takimet dhe aktivitetet gjatë Javës së Nivelit të Lartë të Asamblesë së Përgjithshme të Kombeve të Bashkuara (UNGA), ku Presidentja Osmani do ta përfaqësojë Republikën e Kosovës në cilësinë e saj si kreu i shtetit.
Tutje, në takim është diskutuar për zhvillimet e fundit në vend me fokus të veçantë në çështjet e sigurisë, si dhe tema të tjera të interesit nacional.
Në njoftimin e Presidencës, thuhet se Vjosa Osmani njoftoi ambasadorin amerikan edhe “lidhur me nisjen e fazës së konsultimeve me krerët e partive politike sa i përket zgjedhjeve të rregullta”.
“Presidentja e ka njoftuar ambasadorin amerikan lidhur me nisjen e fazës së konsultimeve me krerët e partive politike sa i përket zgjedhjeve të rregullta”, thuhet në njoftim.
Ndërkaq në këtë takim, Presidentja Osmani u njoftua edhe me zëvendësambasadoren e re të SHBA-së, Anu Prattipati.
