Organizata e Vendeve Eksportuese të Naftës (OPEC) dhe aleatët, të njohur si OPEC+, ranë dakord të dielën t'i përmbahen objektivit të saj për të ulur prodhimin e naftës me 2 milionë fuçi në ditë (bpd) deri në fund të vitit të ardhshëm.

Vendimi u mor në takimin e 34-të ministror të OPEC-ut dhe jo-OPEC-ut me synimin e "stabilizimit të tregjeve globale të naftës", sipas një deklarate.

Takimi u mbajt përmes videokonferencës vetëm një ditë përpara se të hënën të hyjë në fuqi ndalimi i BE-së për eksportet ruse të naftës së papërpunuar në det dhe një kufi i diskutueshëm i çmimit prej 60 dollarë për fuçi për naftën ruse.

OPEC+ ripohoi se vendimi i marrë në tetor për të ulur prodhimin me 2 milionë fuçi në ditë “u nxitur thjesht nga konsideratat e tregut dhe u pranua në retrospektivë nga pjesëmarrësit e tregut se ka qenë kursi i duhur dhe i nevojshëm i veprimit drejt stabilizimit të tregjeve globale të naftës”.

Megjithëse takimi i radhës ministror i grupit është planifikuar për më 4 qershor, Komiteti i tij i Përbashkët Monitorues Ministror (KPMK), i cili mblidhet çdo dy muaj, mund të kërkojë një takim në nivel ministror “për të marrë masa shtesë të menjëhershme për të adresuar zhvillimet e tregut dhe për të mbështetur balancën e tregun e naftës dhe stabilitetin e tij nëse është e nevojshme”, thuhet në deklaratë.

OPEC + më parë uli prodhimin ditor të naftës së papërpunuar me rreth 10 milionë fuçi në prill 2020 për shkak të rënies së mprehtë të kërkesës për shkak të pandemisë COVID-19.

Ndërsa ekonomitë globale dhe kërkesa për naftë filluan të rimëkëmbeshin, grupi filloi gradualisht të rrisë prodhimin nga prilli 2021.

BE-ja do të vendosë sanksione ndaj importeve të naftës së papërpunuar të Moskës duke filluar nga e hëna, duke synuar të frenojë ekonominë ruse në mes të konfliktit të vazhdueshëm me Ukrainën.

Në përputhje me një vendim të marrë më 3 qershor, blloku do të pezullojë importet e naftës bruto ruse, pavarësisht varësisë së tij të madhe nga produktet e hidrokarbureve ruse. BE-ja do të ndalojë gjithashtu blerjen e produkteve të naftës nga Rusia më 5 shkurt.

BE-ja kishte importuar 2.4 milionë fuçi naftë bruto dhe 1.4 milionë fuçi produkte nafte nga Rusia përpara se të shpërthente lufta në Ukrainë më 24 shkurt.

Përveç këtyre ndalimeve të importit, vendet e BE-së dhe G7 kanë rënë dakord të vendosin një kufi të çmimit prej 60 dollarë për fuçi për eksportet ruse të naftës nga deti, i cili gjithashtu hyn në fuqi të hënën dhe do të rishikohet çdo dy muaj.

Palët do të sigurojnë që kufiri i çmimit rus të vendoset të paktën 5% nën çmimin e tregut të naftës së papërpunuar.

Sanksionet e BE-së përfshijnë gjithashtu një ndalim për sigurimin ose shërbime të tjera për anijet që transportojnë naftë ruse. Shumica e këtyre kompanive të sigurimit janë të bazuara në BE ose Britaninë e Madhe.

Sanksionet synojnë të kufizojnë tregjet në të cilat Rusia lejohet të tregtojë.

Shërbimet e transportit dhe sigurimet lejohen vetëm për cisternat që transportojnë naftë ruse të blerë me ose nën kufirin e çmimit 60 dollarë për fuçi./AA