Organizata e Kombeve të Bashkuara tha të martën se Gjykata Ndërkombëtare Penale duhet të njohë diskriminimin gjinor në Afganistan si një krim kundër njerëzimit.

“Opinioni ligjor që kemi marrë tregon se mohimi i arsimimit për vajzat afgane dhe mohimi i punësimit për gratë afgane është diskriminim gjinor, i cili duhet të konsiderohet si një krim kundër njerëzimit dhe duhet të ndiqet penalisht nga Gjykata Ndërkombëtare Penale”, tha Gordon Brown, i dërguari i posaçëm i OKB-së për Arsimin Global dhe ish-kryeministri i Mbretërisë së Bashkuar, ndërsa diskutoi gjendjen aktuale të çështjes së arsimimit të vajzave në Afganistan në një konferencë shtypi të OKB-së.

Ai tha se 54 nga 80 dekrete të nxjerra nga talebanët synojnë në mënyrë eksplicite gratë dhe vajzat dhe i privojnë ato nga të drejtat e tyre, shkruan AA.

Talebanët kohët e fundit lëshuan ndalime shtesë për pjesëmarrjen e grave dhe vajzave në provimet universitare dhe për vizitat në vende publike, duke përfshirë varreza dhe aktivitete të tjera, tha ai.

Për këtë arsye, "Gjykata Ndërkombëtare Penale duhet ta njohë këtë diskriminim gjinor si një krim kundër njerëzimit dhe të hetojë me synimin për të akuzuar dhe ndjekur penalisht ata që janë përgjegjës", theksoi Brown.

Brown bëri thirrje për lirimin e drejtuesve të OJQ-ve në burg, të cilët janë burgosur për mbrojtjen e të drejtave të grave dhe vajzave dhe i kërkoi komunitetit ndërkombëtar të tregojë se arsimi mund të arrijë tek populli i Afganistanit.

Vendet muslimane duhet të tregojnë se Islami është i favorshëm për arsimimin e vajzave, thotë Brown

Nëse klerikët fetarë do të ishin në gjendje të tregonin se Islami është në të vërtetë i favorshëm për arsimimin e vajzave dhe se Afganistani nuk mund të ketë sukses si një vend nëse i mohon gjysmës së qytetarëve të tij potencial të drejtën për arsim, ne mund të bëjmë përparim, shtoi Brown.

Talebanët, të cilët u kthyen në pushtet në Afganistan në gusht të vitit 2021, i kanë ndaluar gratë afgane nga arsimi i lartë dhe të punojnë në shumë fusha të sektorit publik.