Lidhja Demokratike e Kosovës (LDK) mund të propozojë edhe Vjosa Osmanin për presidente, tha kryetari i kësaj partie, Lumir Abdixhiku, raporton KosovaPress.

Ai, pas ofertës së LVV-së karshi PDK-së dhe LDK-së për të propozuar tri emra konsensualë për president, tha se nëse kryeministri Albin Kurti dëshiron marrëveshje politike me LDK-në, “atëherë do të propozojnë emra, ku mund të jetë edhe Vjosa Osmani”.

“Nëse dëshiron marrëveshje politike me LDK-në, atëherë ne mund të propozojmë emra. Ne s’kemi nevojë me propozuar tre, por do të propozojmë vetëm një, ku mund të jetë edhe Vjosa Osmani. Le të tregon Kurti a i ka 66 vota për këtë president, pasi mund të jetë. Njëherë duhet me vendosë a dëshiron marrëveshje politike me LDK-në apo dëshiron 90 vota. Meqenëse nuk i ka 90 vota me ne, më tepër më duket manovër politike”, tha ai.

Për cilindo propozim të LDK-së për president, Abdixhiku këmbënguli se do të jenë edhe pesëmbëdhjetë votat e deputetëve të kësaj partie.

“Ne i kemi 15 vota për propozimin e LDK-së. Sapo diskutuam se çkado që propozon LDK-ja, por duhet me pas një marrëveshje politike. Ne ulemi dhe e bëjmë marrëveshjen politike LVV–LDK, nëse donë me bo vetëm me neve, por nëse dëshiron edhe me PDK-në, urdhëro merruni vesh me ta. Por kandidatin që e vendos LDK-ja, ne i kemi 15 vota. Ky është qëndrim i grupit. Ato diskutime që po flitet se LDK-ja s’i ka 15 vota për propozimin e LDK-së janë të pavërteta. Ne patëm takim në grup dhe patëm dakordim që për propozimin e LDK-së, që është zyrtar, ne i kemi 15 vota. Por se përjashtojmë dhe mund të jetë kandidatja Vjosa Osmani, por duhet ta dimë a i ka 66 vota”, shtoi ai.

Megjithatë, Abdixhiku e akuzoi kryetarin e Vetëvendosjes, Albin Kurti, se nuk ka dashur marrëveshje politike me LDK-në për postin e presidentit.

Lëvizja Vetëvendosje të shtunën ka ftuar dy partitë më të mëdha opozitare, Partinë Demokratike dhe Lidhjen Demokratike, që të dalin me tre emra të përbashkët, jo partiakë dhe unifikues, për president deri të dielën në mbrëmje.

Sipas tij, në këtë formë Kurti po dëshmon se nuk po mundet pa PDK-në.

“Kurti po i kërkon 90 vota, LDK-ja s’mundet me i bë 90 vota. Ai po kërkon bashkëpunim edhe me PDK-në. Vitin e kaluar kur kisha propozuar qeverinë e unitetit, më thonin se pa PDK-në nuk po mundesh. Këtë herë ai nuk po mundet pa PDK-në. Po të kishte dashur vetëm me LDK-në, ne kemi qenë në diskutime dhe kemi pasur diskutime të gjata për marrëveshje politike me LDK-në. Nëse dëshiron vetëm me PDK-në, le të mblidhen ata dhe t’i bëjnë 75 vota dhe nëse i bëjnë vetëm 15 vota të LDK-së, ulemi dhe flasim”, shtoi ai.

Përkundër kësaj, Abdixhiku tha se çështja e presidentit për LDK-në është e mbyllur, mirëpo do të tentojnë deri në momentin e fundit për ta zgjedhur presidentin, për të mos thënë pati bllokada dhe gjuhë fajësuese.

“Për LDK-në kjo është e mbyllur, por nëse duhet deri në momentin e fundit dhe mos me thanë që s’po dojnë dhe po dojnë bllokada me bë gjuhë politike e fajësuese. Tani jemi në fushatë, por gjithçka ia vlen. Për mua është e mbyllur sepse s’kemi pasur marrëveshje pasi ka insistuar që kandidati të jetë i LVV-së”, shtoi ai.

Kuvendi ka afat deri më 28 prill për ta zgjedhur presidentin, në të kundërtën vendi shkon në zgjedhje të reja. /KosovaPress/

/Kosovapress/