Këshilli i përgjithshëm i Lidhjes Demokratike të Kosovës ka votuar pro propozimit të kryetarit të kësaj partie Lumir Abdixhiku, që ky i fundit të jetë kandidat për kryeministër, ndërsa Vjosa Osmani kandidate për president dhe bartëse e listës.

Ky propozim, i miratuar tashmë nga kryesia e partisë, është paraqitur si një ofertë e plotë politike për t'i dhënë fund një krize të gjatë institucionale.

“Lidhja Demokratike e Kosovës të garojë me presidenten Vjosa Osmani si kandidate për presidente të Republikës, dhe njëkohësisht bartës të listës sonë zgjedhore dhe me mua, kryetarin e LDK-së, si kandidat nga LDK për kryeministër të Republikës. Ky propozim bashkimi është mbështetur dhe votuar në plotni nga kryesia e Lidhjes Demokratike të Kosovës. Sot këtë propozim po e shtroj edhe para jush, para Këshillit të Përgjithshëm”, tha ai.

Gjatë fjalimit të tij para Këshillit të Përgjithshëm të LDK-së, Abdixhiku bëri një analizë të thellë të situatës politike, duke e cilësuar atë si një “krizë të normalizuar” që ka pllakosur vendin për më shumë se një vit e gjysmë.

Ai kritikoi ashpër atë që e quajti “mendësi e kapjes së gjithçkaje”, duke akuzuar kundërshtarët politikë se po kërkojnë kontrollin absolut mbi qeverinë, kuvendin dhe presidencën, duke e shndërruar vendin në një sistem “parti-shtet”.

Sipas tij, LDK ka mbajtur një qëndrim konstruktiv, duke ofruar alternativa dhe duke qenë e gatshme për konsensus, por është përballur me një palë që “kërkonte gjithçka”.

Sipas Abdixhikut, as ai dhe asnjë anëtarë i LDK-së, nuk mund të pranonte një situatë ku një parti përfundon me një kontroll të plotë mbi qeveri, mbi shumicën në kuvend, e kontroll të plotë me anëtarë partie në presidencë.

Ai në fund theksoi se LDK do të dalë para qytetarëve dhe me një listë garuese që e përfaqëson seriozitetin, përgatitjen dhe frymën e re të shtetit që duhet edhe duam ta ndërtojmë.

Me 110 kandidatë që nuk do të jenë thjesht emra në një listë zgjedhore, por bartës të proceseve më të rëndësishme të historisë moderne të Kosovës. Sepse gjenerata politike që del nga këto zgjedhje, do të ketë përpara detyra shumë të mëdha shtetërore.

/Kosovapress/