Nuk ka asnjë ndryshim të planeve të sigurisë së KFOR-it në Kosovë, ka deklaruar ministri i mbrojtjes së Shqipërisë, Ermal Nufi. Një gjë e tillë, ai tha se i është konfirmuar në takimet që ka pasur në Bruksel me sekretarin e përgjithshëm të NATO-s, Mark Rutte por edhe me kryetarin e Komitetit Ushtarak të NATO-s, Giuseppe Vaco Dragone.

Në këto takime, ai shtoi se ka ngritur shqetësimin për nivelin e sigurisë në Kosovë por edhe rajon.

Këto deklarime ai i bëri pas vizitës dhe takimit me homologun e tij nga Kosova, Ejup Maqedonci.

Pas takimit, ministri Maqedonci tha se kanë diskutuar për ndërtimin e kapaciteteve ushtarake dhe bashkëpunimit në aspektin e mbrojtjes me Shqipërinë.

Ai ka folur se cili mund të jetë bashkëpunimi me Shqipërinë sa i përket fushës së industrisë ushtarake.

Ministri i Mbrojtjes së Shqipërisë, Ermal Nufi tha se “Republika e Shqipërisë qëndron krah për krah me Kosovën”. Ai tha se bashkëpunimi me Kosovën është thelbësor për rritjen e kapaciteteve dhe garantimin e sigurisë së të dyja vendeve.

Po ashtu, foli edhe për nivelin e sigurisë në Kosovë, për çka tha se një gjë e tillë i është garantuar në takimet që ka pasur në Bruksel.

Ministrisë i Mbrojtjes së Shqipërisë u pyet edhe pwr armatimin e Serbisë nga Kina, për çka tha se kjo i takon këtij vendi.

Kosova dhe Shqipëria do të dërgojnë trupat e tyre në Gaza, në kuadër të Forcës Ndërkombëtare Stabilizuese të paraparë me themelimin e Bordit të Paqes, të presidentit amerikan, Donald Trump.

Ministri Nufi tha se ende nuk është përcaktuar numri i trupave që do të dërgohen në Gaza.

Me ceremoni ushtarake e ka pritur ministri i Mbrojtjes, Ejup Maqedonci homologun e tij shqiptar, Ermal Nufi.

Pas pritjes ata kanë zhvilluar një takim në ambientet e Ministrisë së Mbrojtjes.

/Kosovapress/