Gjykata Themelore në Prishtinë ka caktuar masën një muaj paraburgim ndaj të pandehurit S.M., për kryerjen e veprave penale bashkimi për veprimtari kundër kushtetuese, rrezikimi i personave nën mbrojtje ndërkombëtare, pjesëmarrja në turmë që kryen vepër penale dhe huliganizmi dhe veprën penale sulmi ndaj personit zyrtar.

Gjykata ka vlerësuar se ekzistojnë kushtet dhe arsyet ligjore për caktimin e paraburgimit, duke marrë parasysh mënyrën dhe rrethanat në të cilat janë kryer veprat penale, veçanërisht rrezikshmërinë shoqërore të veprave penale, pasojat nga të cilat janë lënduar shumë pjesëtarë të KFOR-it, zyrtarë policorë, gazetarë e qytetarë të tjerë, si dhe dëmet materiale të shumta nga djegia dhe dëmtimi fizik, tregon mjaftueshëm se i pandehuri nëse lihet që të mbrohet në liri do të tentojë të ndryshojë provat e veprës penale, duke ndikuar në të dyshuarit e tjerë, të cilët gjenden të lirë si dhe dëshmitarët tjerë eventualë.

I njëjti lehtë mund të arratiset duke marrë në konsideratë faktin se S.M. është shtetas edhe i Serbisë dhe nëse lihet në liri, mund të arratiset. S.M. dyshohet se me një grup të dyshuar ka qenë pjesëmarrës i protestave të organizuara më 29 maj 2023 para objektit të Komunës se Zveçanit, duke sulmuar KFOR-in dhe Policinë e Kosovës, si dhe duke përdorur shkumë ka tentuar të bëjë bllokimin e ventilimit të veturës së policisë në të cilën në ato momente gjendeshin të ngujuar brenda në veturë zyrtarë policorë, e qëllimi i të pandehurit ka qenë që këtyre zyrtarëve policorë t’iu ndalet furnizimi me oksigjen duke rrezikuar seriozisht jetën e zyrtarëve policorë, me çka nga veprimet e këtij të pandehuri përmbushën të gjitha elementet e veprave penale për të cilat dyshohet.

Kundër këtij aktvendimi, palët e pakënaqura kanë të drejtë ankese në Gjykatën e Apelit, përmes Gjykatës Themelore në Prishtinë.