Një gazetar u qëllua për vdekje të enjten nga persona të armatosur në shtetin Veracruz të Meksikës, raportuan mediat lokale.

Luis Angel Lopez Valdez, i cili mbulonte çështjet e policisë dhe të gjykatës, u sulmua në lagjen Colonia Cazones të qytetit të Poza Rikës.

Në një deklaratë të postuar në rrjetet sociale, gazeta ku punonte Lopez Valdez tha: "Lopez Valdez u ndalua nga persona të armatosur ndërsa po ecte me makinë nëpër Poza Rica herët këtë mëngjes. Ai u sulmua dhe vdiq në vendngjarje."

Menaxhmenti i gazetës bëri thirrje për drejtësi, duke thënë: "Ne kërkojmë drejtësi nga Komisioni Shtetëror për Mbrojtjen dhe Mbështetjen e Gazetarëve (CEAPP) për gazetarin tonë të Vanguardia de Veracruz. Kjo vrasje nuk duhet të mbetet pa u ndëshkuar."

Autoritetet thanë se kanë nisur një hetim për incidentin.

Veracruz konsiderohet si një nga rajonet më të rrezikshme në Meksikë për gazetarët dhe ka parë sulme të shpeshta kundër punonjësve të medias, shkruan AA.

Sipas Reporterëve pa Kufij (RSF), Meksika konsiderohet si një nga vendet më vdekjeprurëse në botë për gazetarinë, me më shumë se 150 gazetarë të vrarë që nga viti 2000, ndërsa 28 janë zhdukur.