Janë hapur edhe zyrtarisht Lojërat Mesdhetare në Rërë që do të mbahen në Heraklion të Greqisë.

Në këto lojëra, Kosova do të përfaqësohet me 26 sportistë të sporteve të volejbollit në rërë, basketbollit 3X3, hendbollit në rërë, karate në kata dhe notit në ujëra të hapura.

Në defilimin dhe prezantimin e Kosovës para 25 shteteve, i pranishëm ishte edhe kryeministri i Republikës së Kosovës, Albin Kurti, ministri i Financave, Hekuran Murati, zëvendësministrja e Ministrisë për Kulturë, Rini dhe Sport, Daulina Osmani si dhe kryetari i Komunës së Prishtinës, Përparim Rama, raporton KosovaPress.

Kujtojmë se vetëm një ditë para nisjes së këtyre lojërave, Kosova fitoi të drejtën për organizimin e Lojërave Mesdhetare për vitin 2030.