Prokuroria Themelore në Prishtinë, përkatësisht Departamenti për Krime të Rënda – Njësiti për Krime Ekonomike dhe Korrupsion, ka ngritur aktakuzë ndaj të pandehurës F.B., hetuese policore, për veprën penale “Keqpërdorimi i informatës zyrtare” nga neni 416 i Kodit Penal të Republikës së Kosovës.

Sipas prokurorisë, pas zhvillimit të hetimeve dhe ndërmarrjes së veprimeve të nevojshme procedurale, ekziston dyshimi i bazuar mirë se e pandehura, në cilësinë e personit zyrtar dhe hetuese në ekipin për Hetimin e Personave të Zhdukur, ka keqpërdorur informata zyrtare në të cilat kishte qasje për shkak të detyrës së saj, transmeton KosovaPress.

Dyshohet se ajo, me kërkesë private të mikut të saj A.P. dhe me qëllim që ky i fundit të përfitonte përparësi që nuk i takonin, është kyçur përmes llogarisë zyrtare në Sistemin Informativ të Policisë së Kosovës (SIPK), ku ka siguruar të dhëna personale dhe të kaluarën kriminale të të dëmtuarit F.M.

Sipas aktakuzës, këto të dhëna ajo ia ka dërguar A.P.-së përmes rrjetit social WhatsApp, ndërsa ky i fundit i ka publikuar ato me qëllim të diskreditimit të të dëmtuarit në një emision televiziv më 20 dhjetor 2025.

Prokurori i shtetit ka bërë të ditur se do të vazhdojë punën për ruajtjen e sigurisë dhe rendit juridik në Republikën e Kosovës, duke luftuar dukuritë negative, me theks të veçantë në mbrojtjen e informatave konfidenciale që kanë ndikim të drejtpërdrejtë në jetën e qytetarëve.

/Kosovapress/