Zyra Kombëtare e Auditimit ka identifikuar një sërë parregullsish në Ministrinë për Komunitete dhe Kthim (MKK) gjatë auditimit të pasqyrave financiare për vitin 2025, duke konstatuar mangësi në menaxhimin e pasurisë, regjistrimin e investimeve dhe zbatimin e rekomandimeve të mëhershme. Raporti ka rezultuar me opinion të kualifikuar për pasqyrat financiare të ministrisë.

Një nga gjetjet më interesante të auditorit lidhet me investimet kapitale të realizuara nga ministria. Sipas raportit, disa investime të përfunduara dhe të dorëzuara te përfituesit vazhdonin të figuronin në regjistrat e ministrisë si pasuri e saj, duke krijuar pasqyrim jo të saktë të aseteve. Për auditorin, kjo ka shkaktuar mbivlerësim të pasurisë kapitale dhe ka ndikuar në besueshmërinë e pasqyrave financiare.

Gjatë auditimit janë identifikuar 22 artikuj të pasurisë në vlerë 256, 463 euro, të cilët edhe pas pranimit teknik dhe dorëzimit te përfituesit, vazhdonin të figuronin në regjistrat e Ministrisë për Komunitete dhe Kthim si pasuri e saj.

Po ashtu, janë identifikuar katër artikuj të pasurisë kapitale me vlerë totale 5,272 euro që nuk ishin regjistruar fare në regjistrin e pasurive, duke rezultuar në nënvlerësim të pasurisë së ministrisë.

Auditorët vlerësojnë se këto mangësi janë rezultat i kontrolleve të pamjaftueshme të brendshme dhe mosazhurnimit të duhur të regjistrave të pasurisë. Edhe pse ministria kishte ndërmarrë disa veprime për korrigjimin e situatës, problemet vazhduan të evidentohen gjatë vitit 2025.

Raporti tregon se një nga rekomandimet kryesore të auditimit të vitit paraprak, që kishte të bënte me bartjen e pronësisë së investimeve te përfituesit dhe azhurnimin e regjistrit të pasurisë, nuk është zbatuar. Auditorët konstatuan se edhe gjatë vitit 2025 janë hasur raste të ngjashme, duke bërë që rekomandimi të mbetet i pazbatuar.

Një element që bie në sy është fakti se Ministria për Komunitete dhe Kthim nuk gjeneron të hyra të rregullta, ndërsa gjatë vitit 2025 ka realizuar vetëm 7,870 euro të hyra të tjera, një shumë simbolike krahasuar me buxhetin prej mbi 8 milionë eurosh që ka administruar.

Sipas auditimit, ministria ka shpenzuar 8.17 milionë euro gjatë vitit 2025, ku pjesa më e madhe e mjeteve është orientuar në subvencione dhe transfere, investime kapitale dhe paga.

Auditorët kërkojnë forcimin e kontrolleve të brendshme, regjistrimin e saktë të pasurisë dhe bartjen në kohë të investimeve te përfituesit, në mënyrë që pasqyrat financiare të paraqesin gjendjen reale të aseteve të ministrisë.

/Kosovapress/