Kandidati për deputet nga radhët e Partisë Demokratike të Kosovës, Nderim Mustafa, ka kritikuar qeverisjen aktuale për, sipas tij, mungesën e investimeve në Gjilan dhe rajonin e Anamoravës.

Përmes një postimi në Facebook, Mustafa ka deklaruar se Gjilani dhe Anamorava janë lënë në harresë nga Qeveria Kurti, duke përmendur mungesën e projekteve të rëndësishme infrastrukturore, si stadiumi, autostrada dhe hekurudha.

“Gjilani dhe Anamorava janë lënë në harresë nga qeveria Kurti. Pa stadium, pa autostradë dhe tash me premtimin e rremë për hekurudhën”, ka shkruar Mustafa.

Ai u ka bërë thirrje qytetarëve që në zgjedhjet e 7 qershorit të mbështesin Partinë Demokratike të Kosovës, duke theksuar se kjo parti ka realizuar projekte të rëndësishme për vendin, përfshirë ndërtimin e autostradave dhe forcimin e institucioneve të sigurisë.

“Ju ftoj ta votojmë Partinë Demokratike të Kosovës, që ka ndërtuar autostrada dhe ka ngritur policinë dhe ushtrinë e shtetit. Stop mashtrimeve. Ta ndryshojmë Kosovën!”, është shprehur ai.