Muzeu i Qytetit të Mitrovicës është pranuar zyrtarisht si anëtar i Network of European Museum Organisations (NEMO), duke u bërë pjesë e një prej rrjeteve më të rëndësishme evropiane të muzeve dhe organizatave muzeale. Ky zhvillim shënon një hap të rëndësishëm drejt ndërkombëtarizimit të skenës muzeale në Kosovë.

Muzeu i Qytetit të Mitrovicës është institucion publik komunal kulturor që vepron në kuadër të Drejtorisë për Kulturë, Rini dhe Sport, me mision ruajtjen, hulumtimin dhe prezantimin e trashëgimisë historike e kulturore përmes ekspozitave, programeve edukative dhe aktiviteteve që synojnë përfshirjen e komunitetit.

Drejtoresha e muzeut, Nora Prekazi, ka thënë për KosovaPress se ky anëtarësim përfaqëson një njohje të rëndësishme ndërkombëtare për institucionin.

“Pranimi i Muzeut të Mitrovicës në Network of European Museum Organisations është një moment shumë i rëndësishëm për institucionin tonë dhe për skenën muzeale në vend. Kjo është një njohje ndërkombëtare e punës sonë dhe një hap konkret drejt integrimit në rrjetet profesionale evropiane”, ka deklaruar Prekazi.

Ajo ka theksuar se ky zhvillim hap mundësi të reja bashkëpunimi dhe ngritje të standardeve profesionale.

“E shohim këtë si një mundësi për të forcuar vizionin tonë si ‘Muze për të gjithë’, për të zgjeruar bashkëpunimet ndërkombëtare dhe për të ngritur standardet profesionale në shërbim të komunitetit. Njëkohësisht, shpresojmë për më shumë përkrahje institucionale për të siguruar një seli të përhershme dhe infrastrukturë të përshtatshme fizike për muzeun,” ka shtuar ajo.

Anëtarësimi në këtë rrjet evropian vlerësohet si një hap i rëndësishëm drejt forcimit të rolit të muzeut në jetën kulturore dhe edukative të vendit.

/Kosovapress/