Mitrovica ishte mrekullia dhe kryefjala e futbollit në UEFA Champions League-n e femrave, të mërkurën.

Ekipi me këtë emër nga qyteti kosovar buzë Ibrit, arriti fitoren më të lartë në raundin e parë kualifikues duke mposhtur me hiq më pak se 10 me 0 klubin nga Moldavia Zimbru Chisinau.

Ky ishte jo vetëm rezultati më bindës i ditës, por edhe një nga fitoret më të thella të regjistruara në fazat kualifikuese të garave evropiane për klube.

Ndeshja që u zhvillua në kampin nacional të Hajvalisë regjistroi edhe numrin më të madh të golave, nga 10 duelet që u zhvilluan të mërkurën. Në fakt, mitrovicaset i fituan të dy gjysmë pjesët me rezultatin 5 me 0.

Mrekullia tjetër është se lojtarja Edona Kryeziu i shënoi 4 gola në pjesën e parë të lojës. Ajo qëlloi rrjetën e moldaveve në minutat 13', 17', 42', 44'

Golin e pestë të pjesës së parë për Mitrovicën e regjistroi Ambra Gjegji, në minutën 24.

Produktivitet të lartë pati edhe lojtarja tjetër, Aurora Mulliqi, e cila shënoi ‘het-trik”, në pjesën e dytë, duke mposhtur portieren mysafire në minutat 48', 58', 61'.

Blerta Shala shënoi në minutën 65, ndërsa Bardha Mahmuti qoi topin në rrjet në të 88-n.

Vajzat e Mitrovicës regjistruan 20 gjuajte direkte në portën e moldaveve, ndërsa patën edhe 9 aksione në të cilat ato u zunë në pozitë jashtë loje.

Mitrovica ishte pjesë miniturneut të katër të asaj që njihet si Rruga e Kampionëve (Champions Path - CP) ku pos klubit kosovar dhe atij moldav, bëjnë pjesë edhe Ludogorets nga Bullgaria dhe Ki Klasvik nga Ishujt Faroe. Ndeshja mes këtyre dy të fundit përfundoi me fitoren e bullgareve 3 me 0.

Ekipi kosovar do të takohet me Ludogorets në finalen e këtij grupi, ndërsa fituesi kalon në xhiron tjetër.

Kryetari i KF Mitrovica, Hajrullah Haxhiu tha se pret rezultat të mirë edhe në ndeshjes e së shtunës, e cila, po ashtu, luhet në kampin nacional në Hajvali.

“Gjasat janë 50 me 50 por mendoj se ne kemi përvojë më shumë në gara ndërkombëtare”, tha ai për KosovaPress. “Besoj që kemi ekip të mirë dhe pres të kualifikohemi në raundin tjetër”.

Haxhiu tha se një ndihmë e madhe për vajzat e Mitrovicës do të ishte edhe prania në numër të madh e tifozëve në ndeshjen e së shtunës, pasi ko do t’i motivonte edhe më shumë për një fitore te madhe ndaj bullgareve të Ludogorets.

Mrekullia e mitrovicaseve është mirëpritur edhe nga Federate e Futbollit të Kosovës, e cila në postimin e saj ka shkruar “Krenarë me kampionet tona”, duke uruar vajzat nga qyteti i minatorëve për siç është thënë, fillimin fantastik të garave evropiane.

“Kjo fitore është dëshmi e punës, përkushtimit dhe cilësisë që po ndërtohet çdo ditë në futbollin e femrave në Kosovë dhe e organizimit të mirë të klubit mitrovicas”, është thënë nga FFK. “Mbështetja për zhvillimin e futbollit të femrave mbetet një nga prioritetet tona kryesore, ndërsa arritjet e klubeve tona në arenën ndërkombëtare gjithmonë na bëjnë krenarë”. /KosovaPress/

/Kosovapress/