Thirrje për drejtësi e për të mos heshtur më kanë bërë Vasfija, Shyretja e Ramadani.

Rrëfimet e tyre janë dëshmi e tmerrit që kanë përjetuar 20 mijë gra e burra nga Kosova. Në Ditën Memoriale për të Mbijetuarit e Dhunës Seksuale ata kanë ndarë reflektimet e tyre mbi këtë çështje, duke folur edhe për vendimin e tyre që gjithë tmerrin e përjetuar ta ndajnë publikisht.

Gruaja e parë që foli publikisht, Vasfije Krasniqi, pikërisht në ditën që shënon edhe përvjetorin e tmerrit, ka thënë se 14 prilli ia ndryshoi jetën përjetësisht.

"Ambasadorja e Guximit" ka folur në konferencën rajonale në shënim të 14 prillit me temën "Avancimi i qasjes në drejtësi për të mbijetuarit e dhunës seksuale të luftës: Përgjegjësia penale dhe e drejta për kompensim"

Ajo tha se ndjehet krenare për ndryshimet që po ndodhin prej kohës kur ka folur ajo publikisht, por gjithashtu bëri thirrje institucioneve të drejtësisë që të kenë prioritet trajtimin e këtyre rasteve.

Një tjetër grua e guximshme është Shyrete Tahiri, e cila një vit pas Vasfijes, publikisht dorëzoi kallëzim penal pranë Prokurorisë Speciale.

E mbijetuara e dhunës seksuale, Shyrete Tahiri u bëri thirrje të gjithë grave dhe burrave që ende hezitojnë t'i qasen drejtësinë duke thënë "le ta kthejmë frikën tonë në guxim".

Një vit më parë, pikërisht më 14 prill, foli burri i parë i dhunuar seksualisht – Ramadan Nishori nga Drenasi.

Sot ai tha se ka bërë një hap për të inkurajuar të gjithë burrat që vazhdojnë të heshtin edhe sot.

14 prilli është data kur u dhunua seksualisht Vasfije Krasniqi, e cila publikisht në vitin 2018 rrëfeu për tmerrin e përjetuar.

Numri i personave të dhunuar seksualisht gjatë luftës së fundit në Kosovë nuk dihet, por raportet flasin për rreth 20 mijë gra e burra.

/Kosovapress/