Procesi i numërimit të votave të deputetëve në Komunën e Mitrovicës së Veriut, pritet të nisë së shpejti, ndërsa ekipet janë në përgatitjet e fundit për fillimin e procesit.

Kështu ka deklaruar për KosovaPress, ushtruesi i detyrës së Komisionit Komunal të Zgjedhjeve në Mitrovicën e Veriut, Faton Loshi.

“Jemi në përgatitje. Veç po presim të fillojmë. Sapo të na japë qasje KQZ-ja, besoj shumë shpejt do të fillojmë”, ka thënë Loshi.

Përveç numërimit të votave të deputetëve, do të bëhet edhe rikonfirmimi i votave për partitë politike.

Qytetarët e Kosovës votuan të dielën në zgjedhjet e jashtëzakonshme parlamentare për zgjedhjen e përbërjes së re të Kuvendit të Kosovës.

Sipas të dhënave të publikuara nga Komisioni Qendror i Zgjedhjeve, pjesëmarrja në votim në nivel vendi ishte 36.88 për qind.

/Kosovapress/