Ministria e Sportit dhe Rinisë ka hapur zyrtarisht thirrjen publike për mbështetjen e aktiviteteve sportive për vitin 2026, duke vënë në dispozicion një fond total prej 400,000 eurosh.

Kjo thirrje ka për qëllim masivizimin e sportit vendor, promovimin e sporteve tradicionale, si dhe përkrahjen e aktiviteteve me interes publik e atyre në kuadër të "Ditëve të Diasporës".

Një vëmendje e veçantë këtë vit do t'u kushtohet klubeve të femrave dhe atyre që udhëhiqen nga gratë, sportit të komuniteteve, si dhe aktiviteteve për të moshuarit. Të drejtë aplikimi kanë të gjitha klubet, shoqatat dhe OJQ-të sportive të regjistruara në Kosovë, ku mbështetja maksimale për një projekt mund të arrijë deri në 10,000 euro.

Afati i fundit për dorëzimin e dokumentacionit (në formë fizike në arkivin e ministrisë) është data 25 Qershor 2026.

KosovaPress