Ministrat e Brendshëm të Bullgarisë e Rumanisë përshëndesin hyrjen e fundit të dy vendeve në Shengen nga ajri dhe deti
Ministri i Brendshëm në detyrë i Bullgarisë Kalin Stojanov, Zëvendëskryeministri dhe Ministri i Punëve të Brendshme të Rumanisë, Marian-Catalin Predoiu, dhe komisionerja e çështjeve të brendshme të BE, Ylva Johansson u mblodhën të enjten në Sofje për të përshëndetur pranimin e fundit në Shengen nga ajri dhe deti për Bullgarinë dhe Rumaninë. Të dy ministrat nënshkruan gjithashtu një Protokoll dypalësh që ndryshon Marrëveshjen për bashkëpunim policor ndërkufitar në çështjet penale. Më vonë gjatë ditës, komisionerja Johansson vizitoi aeroportin e Sofjes për të parë aranzhimet e saj të reja në lidhje me hyrjen e Bullgarisë në zonën pa kufij më 31 mars.
Në konferencën e përbashkët, Stojanov tha se pranimi në Shengen "është një hap jashtëzakonisht i rëndësishëm për të dy vendet, për të cilin ata kanë punuar shumë, vazhdimisht dhe së bashku që kur u bashkuan me BE-në".
Marian-Catalin Predoiu tha se kontrollet kufitare për udhëtimin ajror dhe detar u anuluan pas një procesi që zgjati më shumë se një dekadë. “Vitin e kaluar u mor një vendim shumë i rëndësishëm dhe ne duhet të vazhdojmë këto hapa në vitin 2024”, shtoi ai. Ai bëri thirrje për "finalizimin e këtij projekti evropian".
Komisionerja Johansson tha se ndërsa të dy vendet po festojnë hyrjen në Shengen, jo gjithçka është perfekte sepse pranimi në Shengen nga toka ende nuk është arritur.
Ajo theksoi se disa ditë më parë Komisioni Evropian miratoi një raport ku rekomandon - për herë të parë - që Këshilli të angazhohet për një datë të saktë për heqjen e kufijve tokësorë. Ajo argumentoi se është diçka që Presidenca belge duhet të sigurojë dhe shtoi se çështja do të diskutohet në Këshillin Evropian në qershor. /BTA-KosovaPress
