Në kuadër të aktiviteteve për shënimin e Ditës së Çlirimit të Prishtinës, sot është mbajtur marshi i UÇK-së në kryeqytet.

Marshi nisi nga sheshi “Zahir Pajaziti” dhe përfundoi në sheshin “Skënderbeu”, ku ish-pjesëtarë të Ushtrisë Çlirimtare të Kosovës parakaluan të veshur me uniformat e luftës.

Para nisjes së marshit, janë bërë homazhe te shtatorja e heroit Zahir Pajaziti.

Në homazhe morën pjesë veteranë të luftës së UÇK-së, si dhe kryetari i Prishtinës, Përparim Rama.

Rama tha se marshi është organizuar për të kujtuar sakrificën e luftëtarëve dhe dëshmorëve që kontribuan për lirinë e vendit.

“Kemi bërë një marsh si shenjë të përkujtimit të sakrificës së madhe, të vlerave të Ushtrisë Çlirimtare të Kosovës dhe të secilit dëshmorë, të secilës familje që ka sakrifikuar gjithçka që sot ta kemi lirinë dhe demokracinë, që sot të bëhemi bashkë dhe të planifikojmë për të ardhmen e vendit tonë”, tha Rama.

Komandanti i Zonës së Pestë Operative Llap-Gollak, Islam Kelmendi, tha për Kosovapress se veshja e uniformës së UÇK-së edhe në këtë përvjetor i zgjon të njëjtat emocione që kishte ndjerë kur ajo ishte prezantuar për herë të parë.

“Uniforma e jonë e cila u dalë edhe doli, kuptohet që ka dalë më 28 nëntor 1997, ku e kanë prezantuar në Llaushë atje, e kam fjalën atje në Drenicë. E për atë, sikur atë ditë, sikur sot unë i ndi ato emocione, a kupton? Sepse është diçka e shenjtë, që është uniformë e cila e kemi tonën edhe e kemi rreshtin. Neve na ka munguar një kohë edhe rreshti, sot e kemi rreshtin, sot rreshtohemi, sot e bëjmë me krenarinë më të madhe këtë, se e di për çka po i bëjmë. Kjo është ajo që e bën, e bën pa lodhje, se është vështirë me mbajtur uniformën, po të them të drejtën se ju jeni civilë, po uniforma e ka temperaturën por krenaria mbi të gjitha. Edhe amaneti i shokëve është që do të shkojmë brend, deri në ushtarin e fundit, deri në luftëtarin e fundit”, tha ai

Aktivitetet për shënimin e Ditës së Çlirimit të Prishtinës nisën që në orët e mëngjesit me homazhe dhe një seancë solemne, ndërsa pritet të vazhdojnë edhe gjatë mbrëmjes me organizime të tjera në kryeqytet.

/Kosovapress/