Trajneri i ri i Kombëtares shqiptare, Rolando Maran, është prezantuar zyrtarisht në krye të kuqezinjve, duke shprehur emocionet dhe objektivat e tij në konferencën e parë për media.
Tekniku italian vlerësoi shpirtin e Kombëtares shqiptare, atmosferën që rrethon ekipin dhe mbështetjen e tifozëve, derisa premtoi se skuadra e tij do të reflektojë agresivitet, karakter dhe krenari në fushën e lojës.
“E kam ndjekur nga afër Kombëtaren Shqiptare dhe për këtë keni gjithë komplimentet e mia. E falënderoj presidentin që me jep mundësinë për të trajnuar një kombëtare që përfaqëson një popull me krenari të madhe duke qenë afër shtëpisë suaj, diçka që unë e kam perceptuar gjithmonë. Është një krenari e madhe për mua dhe premtimi është për të kërkuar të transferojmë atë dashurinë për këtë fanellë ta transferojmë në fushë duke dhënë gjithë brendësinë time”, theksoi fillimisht Maran.
Tekniku italian foli edhe për identitetin që dëshiron t’ia japë skuadrës shqiptare, duke theksuar stilin agresiv dhe forcën në lojë.Maran u ndal edhe te objektivat e Shqipërisë, duke vlerësuar potencialin që ka grupi aktual për të konkurruar edhe ndaj kundërshtarëve më të fortë.
“Mendoj që janë mundësitë dhe kushtet për të arritur në objektiva. Nuk është e lehtë, nuk do të jetë e thjeshtë, por sigurisht mendoj që janë mundësitë për t’ia dalur. Me atë çfarë ju keni, sigurisht se kemi mundësi për të bërë gjëra më tepër dhe ndoshta edhe kundër skuadrave që në letër mund të jenë më konkurruese, duhet të arrijmë t’i përmbushim objektivat për te qenë kompetitiv”, tha Maran.
