Ministri i Mbrojtjes i Kosovës, Ejup Maqedonci, ka deklaruar se ditët e fundit institucionet shtetërore në Serbi kanë rritur nivelin e shpërfaqjes së ideve të vjetra, të cilat për bazë kanë hegjemoninë dhe mos durimin etnik.

Në një postim në Facebook, ministri Maqedonci ka shkruar se vendosja e shërbimit të detyrueshëm ushtarak në Serbi vë në pah se institucionet serbe po synojnë që Ballkanin ta fusin në garë të kapaciteteve ushtarake.

“Përveç vazhdimit të mbështetjes së grupeve paramilitare dhe terroriste, furnizimit me sisteme armatimi nga Rusia dhe Kina, veprimi i fundit e Ministrisë së Mbrojtjes së Serbisë për rikthimin e shërbimit të obligueshëm ushtarak dhe deklarimet cinike të ministrit të Mbrojtjes të Serbisë rreth liberalizimit të vizave dhe ndërlidhja me “parashikimin” e tij për largimin e 500 mijë shqiptarëve nga Kosova në drejtim të BE-së shpërfaq vazhdimësinë dhe prezencën e ideve kolonialiste dhe hegjemoniste te lidershipi politik në Serbi”, shkruan Maqedonci.

Ai thotë se regjimi aktual i Beogradit është vazhdimësi e regjimeve të kaluara të Serbisë duke shtypur liritë më elementare në Serbi dhe si shembull merr rastin e opozitarit Nikola Sanduloviq, i cili u rrah brutalisht nga BIA serbe pasi bëri homazhe dhe kërkoi falje për krimet serbe në Kosovë.

“Para se (ministri serb i Mbrojtjes i Serbisë, Milosh) Vuçeviq të “ëndërrojë” kolonat e kosovarëve duke lënë Kosovën duhet të shqetësohet për nivelin e represalieve që regjimi të cilit ai i takon është duke ushtruar kundër qytetarëve të tij. Dhuna dhe veprimet ndaj opozitarit Nikola Sanduloviq dhe ndaj çdo zëri tjetër demokratik janë tashmë të njohura nga shembujt e ngjashëm që i shohim e dëgjojmë pothuajse çdo ditë në Federatën Ruse, Korenë e Veriut dhe Iran”, thotë ministri Maqedonci.

Rikthimi i shërbimit të detyrueshëm ushtarak, sipas tij, përveç qëllimit për kërcënimin e fqinjëve, ka synim edhe frikësimin dhe mbajtjen nën kontroll të vetë serbëve.

“Për më tepër përmes shërbimit të detyrueshëm, Ministria e Mbrojtjes së Serbisë tenton të fshehë moralin dhe motivin e ulët të ushtarakëve serbë për t’i shërbyer regjimit aktual. Kjo është edhe një ndër arsyet pse lidershipi aktual në Serbi e ka të domosdoshme shfrytëzimin e kriminelëve dhe grupeve jo-formale për të shtyrë para interesat e tij. Në fund përmes shërbimit të detyrueshëm, institucionet në Serbi, synojnë që regjionin e Ballkanit ta fusim në garë të kapaciteteve ushtarake, me qëllim destabilizimin, pengimin e integrimit euro-atlantik të rajonit, dobësimin ekonomik të fqinjëve dhe krijimit të ndjesisë së luftës në prag”, thotë Maqedonci.

Pavarësisht shpërfaqjes agresive të fqinjit verior, ministri Maqedonci thotë se Kosova mbetet e përkushtuar në rrugën e integrimeve euro-atlantike dhe vazhdon të mbështesë zhvillimin e ushtrisë së saj në përputhje me standardet e NATO-s.

“Ministria e Mbrojtjes zhvillon koncepte, si dhe është duke zhvilluar aktivitete bashkëpunimi me institucionet qendrore, nivelin komunale dhe komunitetin për vetëdijesimin e qytetarëve për rolin e secilit qytetar në mbrojtje, siguri dhe mbështetje të autoriteteve civile”, përfundon ministri i Mbrojtjes.