Trajneri i ekipit U-21 i Manchester United Adam Lawrence, ka shprehur entuziazëm për progresin e talentit 18-vjeçar Shea Lacey, i cili tashmë konsiderohet pothuajse pjesë e përhershme e ekipit të parë.

Lacey bëri debutimin e tij me ekipin e parë në humbjen 2-1 ndaj Aston Villa në muajin dhjetor, pasi ishte lënë katër herë më parë në stol pa u aktivizuar. Ai u aktivizua gjithashtu gjatë periudhës së shkurtër kur trajner i përkohshëm ishte Darren Fletcher, duke tërhequr vëmendje me paraqitjen ndaj Burnley, por më pas u përjashtua me karton të kuq në ndeshjen e Kupës FA kundër Brighton.

Pas ardhjes së Michael Carrick në janar, Lacey ka qenë vetëm një herë në stol me ekipin e parë. Megjithatë, forma e tij e shkëlqyer me ekipin U-21 ku ka shënuar gjashtë gola në tre ndeshje dhe rikuperimi nga një dëmtim në pulpë, e bëjnë atë kandidat për ndeshjen çerekfinale të Kupës Ndërkombëtare të Premier League ndaj Real Madridit në “Old Trafford”.

Stafi teknik i klubit beson se kartoni i kuq, për të cilin lojtari kërkoi falje publikisht, ka qenë një mësim i rëndësishëm në zhvillimin e tij.

“Lacey është një rast unik. Ai ka nivel teknik elitar dhe mund të bëjë gjëra me topin që janë të denja për ekipin e parë. Por fizikisht është zhvilluar më vonë, ndaj kërkon kohë dhe durim” – tha Lawrence.

Ai shtoi se Lacey stërvitet rregullisht me ekipin e parë dhe ndjek programin e tyre, ndërsa aktivizohet me ekipin U-21 kur ka nevojë për minuta loje.

Ndeshjen e ardhshme Manchester United e luan kundër Leeds, nga ora 21:00.

KosovaPress