Oda Ekonomike e Kosovës (OEK) bën të ditur se është akredituar zyrtarisht në Paris nga Oda Ekonomike Ndërkombëtare dhe Federata Botërore e Odave Ekonomike për lëshimin e Certifikatave të Origjinës me vlefshmëri ndërkombëtare.

Sipas OEK-ut, certifikata e origjinës “Made in Kosova” tashmë gëzon njohje globale, duke u konsideruar një arritje e rëndësishme për bizneset dhe prodhuesit vendorë.

Nga kjo organizatë vlerësohet se akreditimi përfaqëson një hap të rëndësishëm në fuqizimin e eksporteve të Kosovës, rritjen e besueshmërisë së produkteve vendore në tregjet ndërkombëtare, digjitalizimin e shërbimeve tregtare dhe ofrimin e mbështetjes më të madhe për eksportuesit dhe prodhuesit.

“Produktet kosovare marrin një dimension të ri në tregjet globale, duke e prezantuar vendin me më shumë besueshmëri dhe dinjitet ekonomik”, thuhet në njoftimin e OEK-ut.

Ky zhvillim pritet të lehtësojë proceset tregtare për kompanitë vendore dhe të kontribuojë në rritjen e pranisë së produkteve kosovare në tregjet ndërkombëtare.

/Kosovapress/