Lëvizja Vetëvendosje ka kërkuar që dhjetë projektligje që janë në rend të ditës në seancën e sotme të jashtëzakonshme të miratohen me procedurë të përshpejtuar. Sipas partisë në pushtet është e nevojshme që këto projektligje, mes tyre edhe ai për çmimin tavan dhe për sigurimin e detyrueshëm shëndetësor, të miratohen për shkak të rëndësisë së tyre. Mirëpo kundër formës së miratimit të këtyre projektligjeve u shprehën partitë opozitare, raporton KosovaPress.

Shefja e Grupit Parlamentar të LVV-së, Arbërie Nagavci, tha se projektligjet duhet të miratohen me procedurë të përshpejtuar për shkak të rëndësisë së tyre.

“Për shkak të rëndësisë së jashtëzakonshme që ky projektligj ka për qytetarët dhe deputetët të japin kontributin e tyre në ditët në vijim”, tha ajo.

Kundër miratimit të projektligjeve me procedurë të përshpejtuar u shpreh deputeti i PDK-së, Përparim Gruda.

“Është e pamundur edhe unë që jam jurist me i lexu dhe procesu këto. Ne jemi kundër. Mbi të gjitha pse është e rëndësishme që këto ligje kaq të rëndësishme të shqyrtohen në procedurë të përshpejtuar”, tha ai.

Po ashtu edhe Jehona Lushaku u shpreh kundër që këto projektligje të miratohen në këtë formë.

“Jemi thirrur për t’i kaluar dhjetë ligje të zakonshme të domosdoshme për qytetarët, por për t’iu ikur procedurave të rregullta. Me i kalu dhjetë ligje pa debat, transparencë dhe përgjegjësi”, tha ajo.

Ndërkaq, shefi i deputetëve të AAK-së, Besnik Tahiri, pyeti mazhorancën për urgjencën e miratimit të këtyre ligjeve.

Ai tha se qëllimi kryesor i LVV-së është përgatitja e platformës politike për zgjedhjet e ardhshme.

“Cila është urgjenca, për çka jemi për ngut? Unë iu tregoj në fund mos ta nin. Urgjenca është parapërgatitja e platformës politike për zgjedhje... Kur të dilni në zgjedhje me thanë e kemi bërë ligjin tavan, edhe pse i kemi çu çmimet në tavan për me i rregullu marzhat”, tha ai.

Në rend të ditës për shqyrtim janë këto projektligje:

Shqyrtimi i parë i Projektligjit nr. 10/L-030 për Masat e Përkohshme të Produkteve Themelore në Raste të Veçanta të Destabilizimit në Treg,

Shqyrtimi i parë i Projektligjit nr. 10/L-028 për Sigurimin e Detyrueshëm të Kujdesit Shëndetësor,

Shqyrtimi i parë i Projektligjit nr. 10/L-025 për ndryshimin dhe plotësimin e Ligjit për Kontabilitet, Raportim Financiar dhe Auditim,

Shqyrtimi i parë i Projektligjit nr. 10/L-026 për Shërbimet e Pagesave,

Shqyrtimi i parë i Projektligjit nr. 10/L-027 për Lojërat Mesdhetare XXI Prishtina 2030,

Shqyrtimi i parë i Projektligjit nr. 10/L-021 për Financimin e Menaxhimit të Resurseve Ujore,

Shqyrtimi i parë i Projektligjit nr. 10/L-022 për Banim Social dhe të Përballueshëm,

Shqyrtimi i parë i Projektligjit nr. 10/L-023 për Shtetësinë e Kosovës,

Shqyrtimi i parë i Projektligjit nr. 10/L-024 për Lëndët Plasëse,

Shqyrtimi i parë i Projektligjit nr. 10/L-029 për Provimin e Maturës Shtetërore.

Përkundër debateve Kuvendi miratoi shmangien e afateve procedurale për miratimin e këtyre projektligjeve.

/Kosovapress/