Lushtaku: Drejtësisë nuk i kemi ikur asnjëherë, lufta jonë ishte luftë për liri
Nënkryetari i Komunës së Skenderajt, Sami Lushtaku, ka reaguar për herë të parë pasi u ndalua nga Policia e EULEX-it mbrëmë vonë, me ç’rast iu konfiskua telefoni.
Ai në një postim në Facebook ka falënderuar të gjithë ata që janë interesuar për të, teksa ka thënë se ndihet krenar për gjitha ato që ka bërë për vendin e tij.
“Dëshiroj të ju falënderoj përzemërsisht për interesimin dhe mbështetjen e madhe pas zhvillimeve të ditës së djeshme, të cilat kanë mundur të shkaktojnë shqetësime tek secili prej jush. Gjatë gjithë jetës sime jam munduar të punoj me nder, duke pasur në rend të parë interesin e vendit dhe popullit tim. Jam krenar për gjithçka çfarë kam bërë për vendin tim, liria e të cilit erdhi pas luftës dhe sakrificës së mijëra dëshmorëve e martirëve të cilët ranë gjatë luftës sonë çlirimtare të vitit 1998-1999”, ka shkruar Lushtaku.
Sami Lushtaku del nga zyrat e EULEX-it, i konfiskohet telefoni • KosovaPress
Ai ka thënë se shqiptarët asnjëherë nuk i janë shmangur drejtësisë, teksa ka shtuar se lufta e tyre ishte për liri dhe barazi.
“Në kërkim të drejtësisë tranzicionale në Kosovë, ne shqiptarët kemi paguar çmim të lartë. Drejtësisë nuk i kemi ikur asnjëherë, sepse lufta jonë ishte luftë për liri, barazi e demokraci. Kjo është e vërteta jonë. Jam mirënjohës përjetësisht ndaj secilit prej jush e kështu do të jemi bashkë gjithmonë,” ka përfunduar Lushtaku.