Trajneri i PSG-së, Luis Enrique, ka komentuar periudhën e vështirë që sulmuesi Hugo Ekitike kaloi në klubin parisien, ndërsa tani përgatitet të përballet më ish- ekipin e tij me fanellën e Liverpool.
Ekitike iu bashkua PSG-së në vitin 2022 si një talent premtues, por nuk arriti të tregojë plotësisht vlerat e tij, duke shënuar vetëm katër gola në 33 ndeshje. Më pas u huazua dhe u transferua në Eintracht Frankfurt, ku rilindi karrierën, përpara se të transferohej te Liverpooli verën e kaluar. Në Angli, ai ka shkëlqyer, duke realizuar 17 gola në 43 paraqitje këtë sezon.
“Normalisht, nuk flas për lojtarë që nuk janë te PSG-ja. Më kujtohet koha e tij këtu. Ai luajti shumë mirë në Gjermani dhe tani, aktualisht, te Liverpooli. Ai tani është një lojtar ndërkombëtar dhe mendoj se ka përparuar shumë. Është normale. Ai ishte shumë i ri kur ishte këtu dhe është përmirësuar shumë që atëherë. Por nuk është momenti për të folur për lojtarët e Liverpoolit” – tha Enrique.
Ndërkohë ndeshja mes PSG dhe Liverpool në çerekfinalet e Ligës së Kampionëve do të shënojë rikthimin e Ekitike në Paris, ku ai synon të tregojë formën e tij të shkëlqyer dhe të ndihmojë ekipin anglez në një sfidë shumë të vështirë ndaj kampionëve në fuqi.