SHBA-ja ka propozuar një projekt-rezolutë në Këshillin e Sigurimit të OKB-së, e cila kërkon një armëpushim të përkohshëm në Gaza.

Ajo gjithashtu ka paralajmëruar Izraelin kundër pushtimit të qytetit të mbipopulluar të Rafahut.

Shtetet e Bashkuara kanë shmangur më parë fjalën "armëpushim" gjatë votimeve në OKB për luftën, por presidenti Joe Biden ka bërë komente të ngjashme.

Megjithatë, SHBA planifikon të vërë veton në një projekt-rezolutë tjetër - nga Algjeria - e cila kërkon një armëpushim të menjëhershëm humanitar.

OKB-ja ka lëshuar paralajmërimin e vet se një ofensivë e planifikuar izraelite në qytet mund të çojë në një "masakër".

Uashingtoni ka qenë nën presion të jashtëzakonshëm ndërkombëtar për të përdorur levën e tij për të frenuar operacionet shkatërruese të Izraelit, pasi ka kaluar pjesën më të madhe të luftës duke theksuar të drejtën e aleatit të tij për vetëmbrojtje.

Bisedimet mbi draftin e SHBA-së do të fillojnë këtë javë, por nuk është e qartë se kur ose nëse propozimi mund të vihet në votim. Sipas statutit të OKB-së, anëtarët "pajtohen të pranojnë dhe zbatojnë" vendimet e marra nga Këshilli i Sigurimit - në kontrast me vendimet e marra në Asamblenë e Përgjithshme, të cilat nuk janë detyruese.

Është hera e parë që SHBA-ja ka bërë thirrje për një armëpushim të përkohshëm në Gaza në OKB, pasi ka vënë veton ndaj rezolutave të mëparshme që kanë përdorur këtë fjalë.

Projekt-rezoluta bën thirrje për një armëpushim të përkohshëm në Gaza sa më shpejt të jetë e mundur./BBC