Kryetari i Drenasit, Ramiz Lladrovci, ka reaguar ndaj zhvillimeve të fundit brenda Partisë Demokratike të Kosovës, duke thënë se po ripërsëritet “modeli i ndikimit” në Kryesinë e PDK-së.

Përmes një deklarimi publik, Lladrovci ka kritikuar ata që, sipas tij, po tentojnë ta paraqesin Bedri Hamzën si humbës dhe Fatmirin si jomeritor në listë.

“U ripërsërit modeli i ndikimit në Kryesinë e PDK-së. Kreatorët e kësaj fryme, nuk po i bëjnë shërbim Kosovës e as PDK-së. Për ta paraqitur Bedriun humbës dhe Fatmirin jomeritor në Listë, janë ata që nuk patën guxim të ballafaqohen me pozitën dhe qytetarin ndër vite”, ka deklaruar Lladrovci.

Ai tutje ka shtuar se ata që po krijojnë këtë frymë “nuk patën guxim të ballafaqohen me pozitën dhe qytetarin ndër vite”.

Sipas Lladrovcit, përkrahja e anëtarësisë dhe qytetarëve do të mbetet në anën e PDK-së dhe figurave të saj kryesore.

Lladrovci nuk është anëtar i Kryesisë së PDK-së, përveç në Këshillin e Përgjithshëm të këtij subjekti.

PDK-ja sot mori vendim që mos të përfshihet Fatmir Limaj në listën për kandidat për deputetët në zgjedhjet e 7 qershorit.

/Kosovapress/