Qeveria e Kosovës ka arritur të realizojë vetëm 60 aktivitete, prej 175 që janë paraparë për gjashtë mujorin e parë të këtij viti. Janë 82 aktivitete të tjera të cilat nuk janë realizuar, ndërkaq për 33 aktivitete të tjera nuk kanë ofruar përgjigje zyrtarët përgjegjës të institucioneve. Kështu u tha në konferencën e Lëvizjes Fol, ku u publikuan të dhënat nga monitorimi i realizimit të aktiviteteve të parapara për gjysmën e vitit, në kuadër të Planit Kombëtar për Zhvillim 2023-2025.

Drejtoresha e Lëvizjes Fol, Mexhide Demolli tha se në analizimin e gjashtëmujorit të parë të Planit Kombëtar për Zhvillim të Qeverisë, kanë vërejtur mangësi të tepërta. Sipas saj, një nga të metat është vështirësia e zyrtarëve publikë për planifikim të mirëfilltë në kuptimin e Planit Kombëtar Zhvillimor.

Hulumtuesja e lartë në Lëvizjen FOL, Albani Hasani prezantoi realizimin e këtyre aktiviteteve për secilën ministri, ku u tha se Zyra e Kryeministrit ka realizuar vetëm 13 aktivitete.

Ministria për Komunitete dhe Kthim dhe Ministria e Zhvillimit Rajonal, kanë paraparë një aktivitet gjatë këtyre gjashtë muajve, të cilat janë realizuar. Ndërkaq, Ministria e Mjedisit kishte paraparë realizimin e dy aktiviteteve, ku ka arritur të realizojë vetëm njërën prej tyre.

Në prezantimin e këtij raporti u tha se peshimi është risi e qeverisë në planifikimin operacional, për çka nuk ka informacione dhe shpjegim si kalkulohet.