Seanca e sotme e Kuvendit të Malit të Zi, kushtuar orës së kryeministrit, është ndërprerë pasi përfaqësuesit e opozitës nuk kanë lejuar që ajo të zhvillohet për, siç pretendojnë ata, puçin kushtetues të ndodhur pak ditë më parë.

Më pas komisioni kushtetues i kuvendit konstatoi se ishin plotësuar kushtet për pensionimin e tre prej gjashtë gjyqtarëve aktualë të Gjykatës Kushtetuese.

Pas fjalës hapëse të kryetarit të Kuvendit, lideri i Partisë Demokrate të Socialistëve në opozitë Daniel Zhivkoviq tha se shumica parlamentare pezulloi kushtetutën dhe kreu grusht-shtet kushtetues.

“Pra, kryeministër, ju njoftojmë se ka ndodhur një grusht-shtet dhe ju jeni fajtori kryesor”, tha Zhivkoviq, duke shtuar se edhe Komisioni Evropian e ka konfirmuar atë që opozita e ka thënë prej tre ditësh.

Zhivkoviq ka thënë se kryeministri Milojko Spajiq ka një mënyrë për ta përmirësuar situatën, përkatësisht në seancën e re të komisionit kushtetues, katër përfaqësues të Lëvizjes Evropa të Spajiqit, së bashku me opozitën, mund ta anulojnë vendimin e mëparshëm.

Derisa kjo të ndodhë, nuk do të ketë seancë dhe e gjithë policia dhe represioni nuk do të na pengojnë të mbrojmë Kushtetutën, tha Zhivkoviq.

Pas kësaj para foltores u mblodhën deputetët e opozitës, u dëgjuan edhe fishkëllima dhe seanca u ndërpre.

Opozita më pas nuk e lejoi Spajiq t'u drejtohej gazetarëve në korridorin e Parlamentit të Malit të Zi, por kryeministri iu drejtua gazetarëve në ndërtesën e Qeverisë dhe njoftoi se sonte do të takohet me presidentin Jakov Milatoviq.

"Unë nuk shoh krizë dhe ne jemi të gatshëm të diskutojmë gjithçka. Kriza kushtetuese është kur Gjykata Kushtetuese nuk funksionon. Kemi pesë nga shtatë gjyqtarë, kemi kuorum", tha Spajiq, duke shtuar se ai beson se Gjykata Kushtetuese nuk është e bllokuar.

“Sa i përket krizës që po përpiqet të shkaktojë opozita, them se jemi plotësisht të gatshëm të hyjmë në bisedë”, tha Spajiq.

Kujtojmë, presidenti Milatoviq ka përkrahur më parë opozitën e Malit të Zi, ndërsa herët në mëngjes ka takuar liderët e saj.