LDK: Kurti kishte kauzë manipuluese për vendimin e manastirit, tash e zbaton
Lexohet për: 3 min.
10 muaj më parë
Linku u kopjua
Deputeti i Lidhjes Demokratike të Kosovës, Besjan Mustafa ka thënë se Albin Kurti e ka obligim t’i shpjegojë qytetarëve për kauzën e tij se nuk duhet zbatuar vendimet e Gjykatës Kushtetuese që bazoheshin në vendimet e ish-regjimit të Millosheviqit, e me të cilat i jepej tokë Manastirit të Deçanit, kurse në momentin që vije në pushtet i zbaton po të njëjtat vendime.
Ai në një konferencë për media ka komentuar deklaratat e të dërguarit të posaçëm të Shteteve të Bashkuara të Amerikës për Ballkanin Perëndimor, Gabriel Escobar, lidhur me dinarin dhe marrëdhëniet e Kosovës dhe SHBA-së, ka thënë se janë dëmtuar marrëdhëniet e dy qeverive e jo në mes dy popujve. Mustafa është pyetur edhe për vendimin e Qeverisë për t’i dhënë Masantirit serb të Deçanit tokë, si kusht për t’u anëtarësuar në Këshillin Evropian, ku tha se LDK është pro zbatimit të vendimit të gjyqësorit.
“Vendimi i Gjykatës Kushtetuese është përfundimtar dhe duhet zbatuar. Kauza e Lëvizjes Vetëvendosje kundër këtyre veprimeve që janë vendime të bazuara në vendimet e mëparshme të Millosheviqit e që pastaj vet zoti Kurti i zbaton po të njëjtat vendime, këtë kauzë, zoti Kurti e ka për obligim t’ua shpjegojë qytetarëve të Kosovës se si për 15 vite ka bllokuar çdo proces integrues të Kosovës, si drejt Bashkimit Evropian, si në të gjitha organizatat tjera ndërkombëtare për të bërë Kosovën një shtet normal të arenës ndërkombëtare të shteteve të pavarura, sovrane, i ka bllokuar të gjitha këto procese me të gjitha këto kauza dhe kur vije në pushtet të gjitha këto kauza i shkel duke u thirrur pastaj në ligjshmërinë e këtyre vendimeve“, tha ai.
Përndryshe, Escobar ka thënë se për anëtarësim në Këshillin e Evropës, Kosovës i kanë mbetur edhe dy kushte.
“Tani, janë dy kushte të tjera që i kishte përmendur Këshilli i Evropës dhe që po i kërkojnë disa vende evropiane. Njëri është... [ka të bëjë] me disa veprime për shpronësimet që po bëhen në veri. Dhe, tjetri është Asociacioni”, ka theksuar Escobar.
Escobar më herët ka mirëpritur urdhrin që Qeveria e Kosovës i ka dhënë Agjencisë Kadastrale, për ekzekutim të vendimit të Gjykatës Kushtetuese, sipas të cilit 24 hektarë tokë duhet t’i barten Manastirit të Deçanit.
Këtë urdhër Qeveria e ka dhënë në mbledhjen e mbajtur të mërkurën. Kryeministri Albin Kurti ka thënë se këtë vendim e ka marrë për ta hequr si kusht për pranimin e Kosovës në Këshill të Evropës. Ai ka thënë se Qeveria e Kosovës ka qenë para dy opsioneve: Të plotësojë këtë kusht dhe që Kosova të pranohet në Këshill të Evropës apo të ngelë pa u anëtarësuar.
