Ashtu siç pritej, Lazio ka njoftuar zyrtarisht se Marco Baroni është trajneri i ri i klubit, pas përvojës së tij në Hellas Verona.

Detajet ishin të pakta në deklaratën zyrtare, duke vënë në dukje vetëm se Baroni kishte nënshkruar një "kontratë shumëvjeçare", por besohet të jetë një marrëveshje dyvjeçare me opsionin për vitin e tretë, raporton KosovaPress.

Vendimi ishte marrë javën e kaluar, pasi Maurizio Sarri kishte dhënë dorëheqjen në mars dhe zëvendësuesi i tij Igor Tudor ndoqi rrugën e tij disa ditë më parë për shkak të mosmarrëveshjeve të thella me hierarkinë e klubit mbi strategjinë e transferimit.

Presidenti Claudio Lotito u konfirmoi gazetarëve se Tudor "dëshironte të ndryshonte tetë lojtarë", ndërsa klubi e konsideronte skuadrën aktuale të përshtatshme për objektivat e tyre.

Ultrasit e Lazios po planifikojnë një protestë këtë të diele kundër emërimit të trajnerit të ri, por kryesisht synojnë Lotiton, pasi besojnë se ai po ul pritshmëritë e tyre pas një përfundimi në vendin e shtatë në Serie A.

Baroni do të mbushë 61 vjeç në shtator dhe sapo e shpëtoi Veronën nga rënia në Serie B.

Rolet e tij të mëparshme si trajner përfshijnë Pescara, Novara, Benevento, Frosinone, Cremonese, Reggina dhe Lecce.