Federata e Futbollit e Kosovës, ka vazhduar ndarjen e çmimit tradicional “Ylli i Javës”, i cili i dedikohet futbollistit më të dalluar të javës në elitën e futbollit kosovar.

Për javën e 23-të të këtij sezoni, ky çmim i është ndarë futbollistit të Malishevës, Laurent Xhylani, i cili pati një paraqitje të shkëlqyer në ndeshjen kundër Prishtinës.

Pas pranimit të çmimit, Xhylani u shpreh shumë i lumtur për këtë vlerësim, duke theksuar se ndeshja ndaj Prishtinës ishte përgatitur me shumë kujdes.

“Ka qenë një ndeshje e vështirë, të cilën e kemi përgatitur shumë mirë duke analizuar pikat e forta dhe të dobëta të kundërshtarit. Në fund arritëm një fitore shumë të rëndësishme. Në ekip kemi një atmosferë shumë të mirë, sidomos pas ardhjes së stafit të ri të trajnerëve. Synimi ynë mbetet i njëjtë – dalja në Evropë ose titulli kampion. Jam shumë i lumtur për këtë çmim dhe e falënderoj ekipin tim. Këtë çmim ia dedikoj nënës sime” - ka deklaruar ai për faqen zyrtare të FFK-së.

KosovaPress