Sot, në 25 vjetorin e betejës së 12 majit në Anadrini, kryetari i Rahovecit, Smajl Latifi ka thënë se kujtojnë me krenari rezistencën dhe gjakun e dy dëshmorëve, Milaim Krasniqi dhe Elmi Morina, të rënë në Ratkoc. Në shënimin e përvjetorit të kësaj beteje, dëshmitarë e ish-luftëtarë kanë kujtuar 12 orët e luftimeve me armikun, duke thënë se kjo ditë është historike.
Në luftimet e 12 majit, Latifi ka theksuar se historia është shkruar me gjakun e Milaim Krasniqit dhe Elmi Morinës.
Tutje, Latifi ka përmendur edhe veprimet e organizuara për bazën e armatimeve në trevat e Anadrinit. Në shënimin e përvjetorit të betejës së 12 majit, ai ka thënë se zhvillimet në këto pjesë kanë treguar se lufta për liri ka qenë e pashmangshme.
"Në hyrje të Ratkocit, afër vullkanizerit sulmuan policinë dhe beteja kishte filluar tashmë dhe shokët tanë të organizuar po bënin detyrën. Atë ditë u bënë shumë më shumë, plot të tjerë nxorrën armët për të shkrepur kundër të huajit. Barrikadat brenda fshatit e në dalje të Malësisë, krismat e pushkave tona i ç'orientuan milicët serbë, të cilët për t’u hakmarrë gjuajtën me armë edhe nxënësit filloristë. Të gjithë shokët e organizuar besonin se armikun mund ta mundim vetëm duke luftuar. Luftimet zgjatën deri në orët e vona të pasdites. Në luftimet e 12 majit, historia u shkua me gjakun e Milaim Krasniqit dhe Elmi Morinës", ka shtuar Latifi.
Ndërsa, në emër të tri shoqatave të dala nga lufta, Xhavit Jashari është shprehur se lufta e UÇK-së po atakohet edhe sot duke u gjykuar në Hagë, ish-pjesëtarët e UÇK-së.
Ditë historike e ka konsideruar 12 majin e vitit 1998, dëshmitari i kësaj beteje, Isuf Gashi.
12 maji shënohet si Dita e Dëshmorëve në Komunën e Rahovecit./Sh.Pajaziti
