Gjykata Kushtetuese e Republikës së Kosovës ka vendosur lidhur me kërkesën e parashtruar nga Albulena Haxhiu dhe nëntë deputetë të tjerë të Kuvendit të Kosovës, për vlerësimin e kushtetutshmërisë së procedurës për zgjedhjen e Presidentit të Republikës së Kosovës.

Sipas njoftimit zyrtar, Gjykata ka vendosur njëzëri që të hedhë poshtë kërkesën e parashtruesve, duke e konsideruar atë të papranueshme.

Po ashtu, është refuzuar edhe kërkesa për vendosjen e masës së përkohshme.

Gjykata ka bërë të ditur se vendimi do t’u kumtohet palëve të përfshira dhe do të publikohet në gazetën zyrtare të Republikës së Kosovës, në përputhje me legjislacionin në fuqi.

Sipas vendimit, ai hyn në fuqi menjëherë.

Në njoftim theksohet se teksti i plotë i vendimit tashmë u është dorëzuar palëve dhe është publikuar në ueb-faqen e Gjykatës Kushtetuese, ndërsa publikimi në Gazetën Zyrtare do të bëhet brenda afateve ligjore.

/Kosovapress/