Gjykata Kushtetuese e vendit bën të ditur se vendimi lidhur me dekretin e Presidentes së Kosovës, Vjosa Osmani për shpërndarjen e Kuvendit të Kosovës, do të merret pasi të përfundojë shqyrtimi i plotë i të gjitha çështjeve kushtetuese që lidhen me rastin në fjalë.

Kështu, Kushtetuesja vendos masë ndaj dekretit të Presidentes deri më 31 mars.

“Gjykata, më 9 mars 2026, vendosi njëzëri: I. TË CAKTOJË ex officio dhe sipas kërkesës së parashtruesit të kërkesës masën e përkohshme me të cilën ndalohet çdo veprim i Presidentes së Republikës Kosovës në lidhje me Dekretin nr. 24/2026 të 6 marsit 2026, si dhe të ndalojë çdo veprim të Kuvendit të Republikës së Kosovës, në kohëzgjatjen e përcaktuar sipas pikës II të këtij Vendimi; II. TË URDHËROJË që masa e përkohshme hyn në fuqi më 9 mars 2026, në kohëzgjatje deri më 31 mars 2026”, thuhet në njoftimin e Kushtetuese.

Ndërkohë, më 5 mars 2026, Kuvendi i Kosovës kishte mbajtur një seancë të jashtëzakonshme, të thirrur me kërkesë të 42 deputetëve të Lëvizja Vetëvendosje, me pikën e vetme të rendit të ditës zgjedhjen e presidentit të Republikës së Kosovës. Në seancën e 5 marsit, LVV i paraqiti dy kandidatë për postin president, Glauk Konjufcën dhe Fatmire Mulhaxha-Kollçakun. Seanca u ndërprerë në mungesë kuorumi, pasi ishte braktisur nga partitë opozitare.

Ndërsa. presidentja Vjosa Osmani, në mëngjesin e 6 marsit nxori dekretin për shpërdarjen e Kuvendit të Kosovës dhe e mbajti po atë ditë një takim me subjektet politike për të folur për datën e zgjedhje të parakohshme.

Në takim morën pjesë kryetarë të partive opozitare, Partisë Demokratike të Kosovës, Lidhjes Demokratike të Kosovës dhe Aleancës për Ardhmërinë e Kosovës, por jo edhe partia e kryeministrit Albin Kurti.

Sot, Lëvizja Vetëvendosje ka dorëzuar  në Kushtetuese ankesën lidhur me dekretin e presidentes Vjosa Osmani për shpërndarjen e Kuvendit të Kosovës.

/Kosovapress/