Kryeministri i vendit, Albin Kurti u bëri thirrje qytetarëve jorezident të Kosovës, për t’u regjistruar përmes platformës online e-Diaspora.

Kryeministri Albin Kurti gjatë thirrjes së tij përmes një video të publikuar në rrjetin social Facebook, bashkatdhetarët i cilëson si pjesë të pandashme të Kosovës.

Kurti tha se duke u regjistruar si qytetar jorezident është mundësi për të “forcuar lidhjen me atdheun”.

“Procesi i regjistrimit si qytetarë jo rezident të Republikës së Kosovës është mundësia juaj për të forcuar lidhjen me atdheun. Duke u regjistruar, ju bëheni pjesë aktive e ndërtimit të së ardhmes së Kosovës dhe të vetë mërgatës. Përdorni të drejtën tuaj kushtetuese dhe regjistrohuni online përmes platformës e-diaspora deri më 31 gusht 2024”, u shpreh 49-vjeçari”, ka thënë Kurti.

Kryeministri Kurti shton se regjistrimi është i shpejtë dhe i lehtë, por me ndikim të madh.

“E krahas platformës e-diaspora, ju mund të informoheni dhe sipas nevojës edhe të ndihmoheni për t’u regjistruar, në objektet e komunave rajonale të Kosovës, nga zyrtarët e Agjencisë së Statistikave të Kosovës. Regjistrimi është i shpejtë dhe i lehtë, por me ndikim të madh. Të dhënat tuaja do të ndihmojnë në krijimin e politikave që mbështesin mërgatën, përmirësojnë shërbimet, si dhe forcojnë lidhjet kulturore dhe arsimore me atdheun”, theksoi Kurti.

Ai më tej ka thënë se mërgata është pjesë e pandashme e kombit tonë, “andaj ju ftoj që të regjistroheni secili dhe secila prej jush”.

Ndërsa, në procesin e regjistrimit të popullsisë janë regjistruar mbi 600 mijë qytetarë që jetojnë jashtë Kosovës. Megjithatë, regjistrimi për këtë pjesë është i hapur deri me 31 gusht. Ushtruesi i detyrës së drejtorit të Agjencisë së Statistikave të Kosovës (ASK), Avni Kastrati, derisa thekson rëndësinë e këtij procesi për qytetarët me nënshtetësi kosovare, paralajmëron penalizime ligjore për ata që nuk regjistrohen.

https://kosovapress.com/kaq-bashkatdhetare-jane-regjistruar-afati-i-fundit-deri-me-31-gusht