Kurti: Të interesuar që sa më parë të ketë zgjedhje në veri, por jo pa largimin e masave
Lexohet për: 3 min.
1 vit më parë
Linku u kopjua
Kryeministri i Republikës së Kosovës, Albin Kurti deklaroi sot se janë të interesuar që sa më parë të ketë zgjedhje të parakohshme në katër komunat veriore të vendit. Ai theksoi se presin që sa më shpejt të hiqen edhe masat kushtëzuese ndaj Kosovës.
Këto komente shefi i Qeverisë së Kosovës i bëri në një konferencë për medie pas mbledhjes së qeverisë, ku u shpreh se nuk beson që ndokush pret që pa u bërë deeskalimi i plotë të zhvillohen zgjedhje në veri të Kosovës.
Kryeministri Kurti u shpreh i interesuar që sa më parë të zhvillohen zgjedhjet e parakohshme në komunat veriore.
Ai theksoi se si ekzekutiv po punojnë që ndërprerja e mandateve të kryetarëve të komunave të ketë mbështetje ligjore dhe procedurale.
Shefi i ekzekutivit kosovar përgëzoi për vullnetin policët e rinj të komunitet serb që tashmë janë angazhuar në Policinë e Kosovës, derisa tha se faktori ndërkombëtar duhet të jetë më i zëshëm ndaj trysnisë së Beogradit kundër integrimit të serbëve.
Në pyetjen se pse nuk i ka takuar të gjithë kryetarët e katër komunave veriore, Kurti tha se mund t’i takojë, por shtoi se nuk e di sa do të ishte i këndshëm takimi, meqë se kur i takon njerëzit u kërkon të shkojnë në punë.
Lidhur me lirimin e të dyshuarve për sulmet në veri, kryeministri i Kosovës, Albin Kurti tha se nuk di detaje e hollësi për këto vendimi, por nuk është i kënaqur me punën e Prokurorisë.
Kreu i Qeverisë së Kosovës këshilloi gazetarët që përgjigjet për këtë çështje t’i marrin nga Prokuroria e Kosovës.
Ministri i Administrimit të Pushtetit Lokal, Elbert Krasniqi në konferencë për media deklaroi se zgjedhjet e parakohshme mund të zhvillohen nëse 20 për qind e votuesve në një komunë nënshkruajnë një peticion për largimin e kryetarit të asaj komune.
Sa i përket hetimeve të bëra nga task-forca për disa ministra të qeverisë Kurti, vetë ai tha se nuk ka informacion për to.
Ndërsa, ministri i Administrimit të Pushtetit Lokal, Elbert Krasniqi tha se deri sot nuk ka pranuar asnjë ftesë nga asnjë organ hetues që të intervistohet./B.Ibishi/
