Kryeministri i Kosovës, Albin Kurti, ka thënë se Kosova është e interesuar të zbatohet në tërësi marrëveshja me Serbinë dhe jo vetëm neni shtatë i saj. Një ditë pas takimit të kryenegociatorëve të dialogut në Bruksel, Kurti theksoi se formimi i Asociacionit është pjesë e marrëveshjes me Serbinë, por nuk është vet marrëveshja, duke shtuar se duan një plan të zbatimit, i cili është i hollësishëm, konkret, i balancuar dhe gjithëpërfshirës.

Ndërkaq, Kurti tha se ende janë në pritje të qëndrimit të Bashkimit Evropian sa i përket denoncimit të bërë nga pala kosovare për shkeljet e marrëveshjes që i ka bërë Serbia.

Ai shtoi se kanë vërejtje për propozimin e ndërmjetësit të dialogut, Miroslav Lajçak për sekuencimin e zbatimit të marrëveshjes.

Ndërkaq, ai kërkoi nga Bashkimi Evropian që të hiqet referimi i Kosovës me asterisk (fusnotë), pas marrëveshjes me Serbinë, e cila tha se është bërë pjesë e konkluzioneve të Këshillit Evropian. 

I pyetur për modelin e Tirolit Jugor për Asociacionin në Kosovë, Kurti tha se ka modele të shumta që po fliten, por derisa Serbia nuk e pranon pavarësinë e Kosovës dhe refuzon t’i pranojë krimet nga e kaluara nuk mund të flitet për solucione të tilla.

Në anën tjetër, Kurti u pyet edhe për rikthimin e zyrave të MUP-it serb në veri, ku tha se ka pasur lëvizje në teren me direktiva të Beogradit, por këtë çështje po e vlerësojnë edhe organet e sigurisë dhe inteligjencës.