Lidhja Shqiptare e Prizrenit paraqet gurthemelin e përpjekjeve shqiptare për pavarësi, e cila u kurorëzua me shpalljen e Pavarësisë së Shqipërisë dhe shpalljen e Pavarësinë e Kosovës, duke e realizuar kësisoj një pjesë të programit të Lidhjes, që nuk u arrit të plotësohet në vitin 1912.
Kështu tha kryeministri Albin Kurti, me rastin e 146-vjetorit të Lidhjes Shqiptare të Prizrenit që këtë vit mbahet në kuadër të agjendës shtetërore për 25-vjetorin e çlirimit të vendit.
“Kjo është hera e parë në histori kur shqiptarët po flisnin me një zë, pa dallim krahine e feje, duke shprehur kërkesën themelore dhe universale për vetëvendosje dhe për ruajtjen nga copëtimi i territoreve të banuara me shqiptarë", u shpreh kryeministri Kurti.
Ai po ashtu solli në kujtesë faktin që me 27 mars 1999, forcat ushtarake serbe me eksplozivë rrënuan dhe dogjën ndërtesën e Lidhjes së Prizrenit, duke i rrënuar edhe shtatoret e Abdyl Frashërit dhe të Ymer Prizrenit, në përpjekje për të zhdukur gjurmët e historisë shqiptare.
“E megjithatë, as shtypja mbi njëshekullore, plaçkitja, djegia e rrënimi, nuk kanë arritur të asgjësojnë besimin dhe luftën tonë për liri", theksoi kryeministri.
Kurti theksoi se idealet politike të Lidhjes Shqiptare të Prizrenit janë frymëzim në rrugëtimin e përbashkët të shqiptarëve drejt avancimit të interesave të përbashkëta e forcimit politik e ushtarak, ekonomik e kulturor të shteteve tona.
