Kryeministri në detyrë i Kosovës, Albin Kurti, ka njoftuar se Xhamia e Ibrit, e ndërtuar në vitin 1777 dhe e djegur më 2 maj 1999, do të rindërtohet.

Ai në një postim në Facebook bëri të ditur se, sot është nënshkruar marrëveshja e bashkëpunimit për hartimin dhe zbatimin e projektit të rekonstruktimit të kësaj xhamie, në prani të Myftiut Naim Tërnava, kryeimamit Vedat Sahiti dhe ministres Saranda Bogujevci.

“Me këtë memorandum, Qeveria e Republikës së Kosovës mbështet ringritjen e këtij monumenti me rëndësi historike dhe kulturore”, ka deklaruar Kurti.

Ai bëri të ditur se është nënshkruar edhe një memorandum tjetër bashkëpunimi me Bashkësinë Islame të Kosovës, i cili synon forcimin e ruajtjes dhe promovimit të trashëgimisë kulturore islame në vend.

Kryeministri theksoi se këto angazhime janë pjesë e përkushtimit të vazhdueshëm të Qeverisë për mbrojtjen e trashëgimisë kulturore, pas dëmeve të shkaktuara gjatë luftës së viteve 1998–1999.

Sipas tij, investimet në këtë fushë do të vazhdojnë edhe në vitet në vijim.

Ndryshe, Xhamia e Ibrit, e ndërtuar në vitin 1777, ndërsa është djegur nga serbët më 2 maj 1999. Xhamia e Urës së Ibrit, për mitrovicasit simbolizon identitet e histori.

/Kosovapress/